Голосник

Представителі ОСРС їднали з председом уряду загранічных Словаків

У віторок 29-го септембра 2020-го року проходила на Уряді про Словаків жыючіх в загранічу стріча председы уряду Мілана Яна Піліпа з представителями Округлого стола Русинів Словеньска (ОСРС).

За ОСРС брали на робочій стрічі участь председа Петро Штефаняк і правник Мартін Дуфала.

Як інформовав Піліп на своїм офіціалнім сайті на сіті Facebook, вєдно із своїма колеґами рішыли вопрос, о кого бы мала мати Словацька републіка інтерес, ці лем о Словаків, або о вшыткых краянів за граніцями.

„Словакія є мултіетнічнов країнов. Зато в повязаню з приготовльованьом новой Концепції державной політікы Словацькой републікы односно Словаків жыючіх в загранічу на рокы 2021 аж 2025 будеме рішыти і вопрос, о кого бы мала мати Словакія інтерес. Ці лем о людей із Словакії жыючіх в загранічу, котры суть выключно словацькой народности, або ці маєме мати інтерес о вшыткых краянів без огляду на їх етніціту, значіть о тых, котры мають одношіня ку Словакії як ку своїй отцюзнині,“ інформовав на своїм сайті председа Уряду про Словаків жыючіх в загранічу.

„Є важным жебы словацька держава думала нелем на етнічных Словаків, але і на людей іншакой народности, котры із теріторії днешньой Словакії еміґровали. Русины, котры днесь жыють в іншых державах, і мають коріня одтыль, чують, же тото є їх родна земля, мають ку ній одношіня як ку своїй праотцюзннині,“ повів про нашу редакцію по стрічі председа ОСРС Петро Штефаняк.

Покля бы Словацька републіка змінила свою краяньску політіку, і тота бы не была лем про етнічных Словаків, в практіці бы то значіло, же єднакы условії – выгоды, старостливость яку мають Словаци в загранічу од Словакії, бы могли мати і люди іншого етнічного походжіня, котры мають коріня на теріторії днешньой Словакії.

Тема, жебы єднакы права, як мають етнічны Словаци в загранічу, мали і Русины, котры походять з той теріторії, была одкрыта і на Світовім конґресі Русинів, котрый проходив минувшый рік.

Якраз день скоріше, 24-го септембра, в Братіславі першый раз засідала комісія про приготовліня Концепції державной політікы СР в одношіню ку краянам на рокы 2021 аж 2025. Як інформовав Уряд про Словаків жыючіх в загранічу, його цільом про тоты рокы є векше запоїня краянів в загранічу до ходу уряду.

Фото: Мілан Ян Піліп.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі