Представителі Свідника припомянули собі ослободжіня і на Дуклі

Свідницька радніця про пандемію не орґанізовала тот рік пєтны акты з нагоды 76-ой річніці ослободжіня міста, кедьже Словакія є в локдавні.

Но пріматорка міста Марцела Іванчова вєдно із своїм заступником Михалом Ґоріщаком выразили у віторок 19-го януара 2021-го року почливость ослободителям індівідуално. Інформовала о тім аґентура ТASR.

„Памятник совітьской армії у Свіднику днесь творить неоддумательну часть сілуеты Свідника, а іщі выразніше творить сімбол складной войновой історії міста. Ту ся стрічать історія і сучасность нашого міста. Іде о веце як 9000 людьскых жывотів, майже тілько, як має теперь Свідник жытелів. Были далеко од домова, де їх даремно чекали матери, жены ці діти. Воздушнов чаров пару сто кілометрів, но про тых хлопів уж нездолательна далекость,“ повіла Іванчова.

І кедь памятник за їй словами є повязаный з терпіньом, болістьов і стратов, спринимать го і в повязаню з атмосферов тиха, покоя і міру.

„Тоты вояци перемогли, жебы мы жыли в мірі. Є першорядов нашов повинностьов, нашым довгом односно тых павшых, жебы сьме го всокотили і хранили. Лем так їх жертвы не будуть даремны,“ конштатовала пріматорка Свідника.

Іванчову зенпокоює, же в сучасности вопрос войны і міру злегшать ся і баґетелізує, росне екстремізм, счезать толеранція і порозуміня. „Я пересвідчена, же вшыткы мусиме усвідомити собі свою частку одповідности, і пропоновати способы, як тот планый тренд одвернути,“ доповнила.

Память павшый героїв учтили собі коло памятника на Дуклі, у Свіднику, і коло памятника армадного ґенерала Людвіка Свободы.

Жрідло фотоґрафії: Місто Свідник.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА