Префект Конґреґації про восточны церькви навщівив Солотвино

Першый юновый тыждень 2022-го року на пятьдньову навщіву Румунії пришов префект Конґреґації про восточны церькви кардінал Леонардо Сандрі. Почас ньой пришов і до Солотвина в Закарпатьскій области Україны.

Як інформовала україньска редакція порталу Vatican News, Сандрі в Румунії навщівльовав штруктуры і орґанізації, котры помагають тым, хто втікать з Україны з причіны войны. Окрім поздоровлінь і подякы од Папы рисмкого Франціска префект восточной конґреґації приніс до Румунії і матеріалну поміч.

Рано 3-го юна гость з Ватікану пришов до міста Сіґет, де стірчав ся з представителями штруктур, якы принимають біженців, але і з тыма, котрым ся помагать.

Пак кардінал Сандрі перешов румуньско-україньску граніцю і в просторах Румуньского конзултату в місті Солотвино одбыла ся стріча з представителями реґіоналной і містной самосправы, як і з представителями духовенства, меджі котрыма быв і апостольскый адміністратор Мукачівской ґрекокатолицькой єпархії владыка Ніл Лущак.

Як інофрмовав портал Vatican News, серед тем, котры обговорили ся на тій стрічі, была і гуманітарна підтримка про 400 тісяч особ, котры суть внутрішньо переселены, значіть, котры пришли на Підкарпатя і походять з областей, де проходять бойовы дії.

Кардінал Сандрі передав поздоровліня од Веселньского Архієрея і спомянув його чісленны закликы, в котрых одсусдив аґресію, просив заставити огень і выйти на путь переговорів. Владыка Ніл подяковав за стрічу і близкость кардінала. Так само розповів о деякых конкретных припадах, як єпархія помагать страждаючім од войны.

На кінцю стрічі префект Конґреґації про восточны церькви повів: „Вы пережывате Ґетсіманію, але мы вєдно станеме свідками дня світла і воскресіня,“ інформовав портал.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА