Створеный з ініциятивы самой молодежы, накрученый в рамках проєкту «Активне селo» – фільм, котрый оповідат о І і II Світовій Войні, о выселіню, о тым, як пережыл тото вшытко лемківскій нарід. «Така была наша доля» – то наголовок образу, премєра котрого пройде уж в найблизшу неділю, 17. марця 2019 р., о 17.00 год. в Сельскій Світлици в Ждыни.
Думкодавцьом продукциі єст молодый Лемко зо Ждыні, Томек Болех. Така ідея зродила ся в ним уж дуже скорше, лем цілый час бракувало імпульсу, жебы тото зреалізувати. Аж коли явил ся проєкт «Активне село», в рамках котрого участникы мали специяльны занятя, Томек мал нагоду зреалізувати свій плян. «Я сой так думам, може вкінци накручу тото, што єм од давна хотіл», бесідує ждынян.
На занятях веденых в рамках проґраму «Активне село» каждый беручый в них участ мусіл выдумати, а дальше і зреалізувати свою ідею. Думком Томка было накрутити фільм, в котрым через выповіди старшых люди вкаже історию Лемків. Награны были спомины осіб, котры пережылы войны, выселіня, іх родичів та дідів.
В фільмі «Така была наша доля» споминат ся і о Святым Максимі, початках Ватры в Ждыни та церкви в Конечній. О тым вшыткым оповідают Штефан Дзямба, Ева Гыра і Митро Сабатович.
Фільм накрутил Петро Ротко, а в його продукциі помагали Наталия Дзямба, Аня Дзямба, Маґда Болех, Клавдия Дичко, Павлина Дзямба і Кристиян Жолнірчык. Молодіж і діти, якы брали участ в тым проєкті, вчат ся в Основній Школі ім. Александры Вислоцкой в Ґладышові. Координаторами проєкту были Бетка Вуйцік і Данєль Кєрмут.
По премєрі буде мож купити платню з фільмом – ціна бл. 15 зл.
Коментарі