Прецеденсове засуджыня тыкаюче акциі Вісла. Горячий коментар в тій справі од адуката Куровского

Быти може речений вырок спричынит ся тому, што особы пошкоджены в акциі Вісла і іх потомны будут старати ся не лем о фізичне одзыскуваня маєтку (лісів), але і признаня фінансового одшкодуваня. Суд Найвысший в Варшаві оддалил касацийну скаргу Прокураториі Ґенеральной, в наслідстві чого 85-літньому жытельови єдного зо сел в Бєщадах было признаных бл. 400 тис. зл. як рекопменсата за втрачений маєток вчас выгнаня в 1947 р.

Цілий процес перед судами тырвал 15 років. Як для порталю lem.fm повіл адукат Лукаш Куровскій з Ряшова, в першій черзі мусіл він довести вєдно зо своім клієнтом до уневажніня рішыня Повітового Бюра Народовой Рады. Повело ся тото зробити в 2012 році. Зробил тото Міністер і то был початок, же так речу, уж той цивільноправной дорогы за одшкодуваня. По дорозі мусіли сме в цивільным процесі выказати (…), што было предметом того маєтку (…). Третім поступуваньом, а другым перед цивільным судом, было уж поступуваня о одшкодуваня, продолжал в бесіді з нами адукат Куровскій.

Лукаш Куровскій справом занял ся будучы іщы адукатскым аплікантом. По роках долгой борбы є він щестливий, што процес закінчыл ся успішно для його клієнта. Тым більше, што є то перший того рода вырок в Польщы, котрий засуджат одшкодуваня за безправне забраня маєтку вчас акциі Вісла в 1947 році.

Як выявил меценас Куровскій, справа є завершена. Має самособом тиху надію, же держава не поступит на пут введеной недавно до полського правного порядку, тзв. надзвычаной скаргы. 85-літній клієнт задоволений є з засудженой сумы одшкодуваня. Держава выплатила му 381 тис. зл компенсациі вєдно з одсотками.

До той поры пошкодженым в акциі Вісла Лемкам поводило ся одзыскувати переняты на властніст державы лісы. Речений прецеденсовий вырок вказує на можніст доходжыня самого одшкодуваня, незалежно ци страна хотіла бы старати ся о рекоменсату лем за лісы ци просто рільничы ділянкы і пляц з хыжом та ґаздівском забудовом.

Коментар меценаса Лукаша Куровского з Ряшова для ЛЕМ.фм (більше в нашым радию):