Презентація відеокліпу творчого проєкту Два стільці

27-го апріля 2021-го року в просторах Закарпатьского областного музея народной архітектуры і бываня в Ужгороді быв презентованый новый кліп на народну пісню Під дубиною популарной етно-фолк співачкы Мірославы Шип (псевд. Мірослава Копинець).

Кліп быв зробленый у сполупраці із знамым режісером Дмитром Фесенком. Так само были представлены і дві попередні роботы артістів (Не спала я сиї ночі, Тріє царіє). Камераманом вшыткых трьох кліпів є Тимофій Шмайда.

Через карантенны обмеджіня в реґіоні на акції брала участь обмеджена кількость гостів – творчій колектів і запрошена преса.

Сполупраца Копинець і Фесенка

Творча сполупраца етно-фолк співачкы Мірославы Копинець і режісера Дмитра Фесенка зачала ся при натачаню умелецького кліпу на народну пісню Не спала я сиї ночі на кінцю минулого рока.

„По тім было вырішено спробовати заспівати в дуеті тоту саму співанку в авдіо штудію Геннадія Девятова і нашы голосы ся зляли,“ говорить о зроді проєкту Два стільці співачка Мірослава Копинець.

Треба так само припомянути, же Дмитро Фесенко є не лем режісером, але і композітором, і співаком. Якраз перу композітора Дмитра Фесенка належыть гімна Маріїї Терезії під назвов The Wings Of Maria Theresia, шпеціално написана на церемонію нагороджіння орденом Марії Терезії. Як автор він пише свої пісні в векшынов по анґліцькы, але значну часть творчости артісты занимать реалізація музичных проєктів по україньскы і по русиньскы.

„Дмитро Фесенко створює дуже файны відео роботы, не бою ся повісти, же подакотры з них суть світовой уровни. Дуже-м рада, же русиньскый пруд попав у велику річку його творчости,“ говорить Мірослава Копинець.

Не зістало при єдній співанці

По успішнім штарті автентічного тандему із композіційов Не спала я сиї ночі, были выбраны іщі дві далшы русиньскы співанкы на реалізацію: Тріє царіє, Під дубиною.

Відеокліп Тріє царіє представляє ілустрацію стародавной колядкы села Ясіня, на Рахівщіні, із зборника НароднѢ пѢснѢ подкарпатскихъ русиновъ з року 1944. Третя їх робота — новопрезентованый кліп Під дубиною, є зображіня знамой русиньской народной співанкы о вічній любви, запис котрой проходив в Закарпатьскім областнім музично-драматічнім театрі в Ужгороді.

Два стільці натеперь скінчіли

У кліпах співаци сидять на двох стільцях, што і послужыло як іншпірація про назву їх проєкту Два стільці.

„Так мы можеме вказати свою рівность перед Богом, і одкрыти свою душу перед нашыма позерателями, котры в повній мірі мають можность ся концентровати на нашых тварях, а тварь то душа каждого артісты, а не зосереджовати свою позорность на рухах тіл,“ пояснює задум сиджіня на стільцях режісер Дмитро Фесенко.

На презентації было підчаркнуто, же тоты три відекліпы треба поважовати за єден цілок. «Є то своєродный тріптіх,“ пояснює Мірослава Копинець.

В сучасности популарізовати русиньску култруту треба за помочі свіжых новаторьскых ідей, жебы єй звічнити у памяти сучасного общества. Такый приступ хоснує у роботі над проєктом Два стільці режісер Дмитро Фесенко. Говорить, же як іншпірація про кліп Під дубиною послужыв пуларный гіт із 1990-ых років од музичной ґрупы R.E.M. – Losing My Religion.

І на завершіня артісты додали, же на днешній день їх діятелность як умелецького дуету Два стільці є офіціално закінчена, але то не значіть, же не буде слідуючіх сполочных робот. На своїй сторінці на сіті Facebook режісер Дмитро Фесенко написав: „Мы з великым потішіньом і надале будеме наповньовати наш родный край подобныма успіхами про духовный і філозофічный розвиток!“

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА