Презідент Кіска: Русиньска култура є і днесь вынятково жывотаспособна

Презідент Словацькой републікы, як сьме скоріше інформовали, перевзяв покровительство над русиньскым фестівалом у Свіднику, котрый проходив минулый тыждень. З той нагоды єкслузівно выразив ся о Русинах і їх културі про Піддукляньскы новинкы (Poddukilanske noviny). З благосклонным дозволіньом од шефредактора новинок Павла Сивака, приносиме вам слова презідента протлумачены до русиньского языка.

„Маю за велике богатсво Словакії, же окрім майорітного народа ту нашло домів і дакілько народностей. Тым ся по сталітя формовала взаємно ся овпливнююча і толерантна сполочность, в котрій є, покля іде о народностну політіку, на першім місці безпроблемове співнажываня і ґаранція охраны языків і култур народностных меншын.“

Презідент далше підкреслив вынятковость русиньской културы. „І ваша русиньска култура є унікатна і цінна в контексті цілкового културного середовиска нашой отцюзнины. Но є цінна головно про вас, Русинів, котры сьте єй дісталы до колискы од своїх предків, мате єй записану глубоко у своїм сердцю і є частьов вашого каждоденного жывота.“ Далше презідент продовжовав, же є радый третьому річнику фестівалу, бо є доказом, „же русиньска култура є і днесь вынятково жывотаспособна і то вам єднозначно давать право на гордость. Тоту властность єм собі у вас Русинів все цінив.“

Презідент Андрей Кіска выразив ся і ку языку. „Сімпатічна мі є таксамо ваша выняткова намага всокотити собі і хосновати русиньскый язык в штонайшыршій мірі, єднако як розвивати оріґіналну културу і смілость передати єй далшым ґенераціям. В тім маєте мою підтримку і сімпатії,“ інформовали Піддукляньскы новинкы.

Петро Медвідь

Жрідло фотоґрафії: Офіціалный сайт презідента Словацькой републікы.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА