«Приближыти натуру» – новий проєкт Маґурского Нацийонального Парку

Перед тыжньом Яцек Борек, як заступця директора, в імени Маґурского Нацийонального Парку підписал другу в новій фінансовій перспективі 2014-2020 умову на фінансуваня проєкту з середків Европейской Уніі. Проєкт пн. Реалізация едукацийного проґраму для локальной соспільности Маґурского Нацийонального Парку «Приближыти Натуру» реалізуваний буде з Операцийного Проґраму Інфраструктура і Середовиско. Вартіст цілого проєкту то близко 1,9 млн зл, з чого такой 1,5 млн то дотация Евросоюза.

Проєкт реалізуваний буде на обшыри семох ґмін, на котрых находит ся Парк і його хоронена обшыр довкола самого Парку, а то: ґміны Санкова, Крампна, Дукля, Новий Змигород, Ліпінкы, Дембовєц та Осєк Ясельскій. Головном цілю проєкту єст збільшаня свідомости місцевого населіня і іх заанґажуваня в діяня, котры ведут до хороніня природы на обшыри ґмін, сусідуючых з Парком. В рамках проєкту зорґанізуваны будут едукацийны подіі для діти і молодежы на каждым шкільным етапі, тереновы варштаты для працівників самоурядів і природничы варштаты для жытелів выміненых ґмін. Окрем того, печатаных буде вельо едукацийных публикаций, напр. компендиюм знаня для учытелів, брошуры для жытелів ґмін, путівник і часопис.

Більше чытайте на сайті Парку за тым мотузком.