Придме до Лабовой. Споможме добре діло
То остатній момент, жебы ратувати материяльны памяткы з давной Лемковины.
В днях од 27. вересня/септембра до 2. жолтня/октобра в єдным з найбільшых сел на західній Лемковині буде проходил третій етап ремонту памяткового цмонтеря. Бесіда о Лабовій, де од даякого часу ґрупа люди доброй волі веде роботы маючы за ціль сохранити камінны памятникы на місцевым довыселенчым теметові.
Цілый тыжден, в рамках веденых прац, будут проходити і камінярскы варштаты. Орґанізатором того проєкту єст ЛАПіТ «Кычера» з Ліґници. Варштатам і мериторичным роботам при камінных памятниках буде проводил Шымон Моджеєвскій зо Стоваришыня Маґурич.
Кажды рукы ся придадут
Як інформували нашу редакцию думкодавці ратуваня лабівского цмонтеря, до спільного творіня доброго діла закликаны сут вшыткы, якы лем хотіли бы фізично спомочы цілотыжньовы роботы.
«Старый лемківскій цмонтір в Лабовій то маґічне місце, де будете мати неповторну нагоду зглубити тайникы реновациі камінных памятників», пише ся в запрошыню до участи.
В попередніх робочых таборах в Лабовій брали участ особы з ріжных части Польщы. Были місцевы Лемкы, але тіж потомны выселеных Лемків, што днес прожывают на чужыні. Свою волонтерску поміч несли тіж місцевы сусіды – Полякы. Прото кажда поміч до роботы ся придаст і за кажду таку роботу орґанізаторы будут дуже вдячны. Орґанізаторы табору просят горячо каждого, хто лем має дяку дакус своіх сил і здібности внести в ратунок камінным памятникам.
Особы, якы хочут спомочы добре діло, можут контактувати ся з думкодавцями ініциятивы, посылаючы майль на адрес: remontlabowa@gmail.com. Для охочых на місци забезпечены мают быти нічліг і ідло.
Сохраненый перед ліквідацийом
Цмонтір в Лабовій то єден з найбільшых лемківскых цмонтерів, якому іщы не так давно горозила ліквідация. Щестливо стараньом ЛАПіТ «Кычера» повело ся зобрати фінансовы середкы на його ратуваня і упорядкуваня. Реализация той задачы была можлива завдякы дотациі Міністра Внутрішніх Справ і Адміністрациі. Теперішні варштаты то дальшый етап модернізациі захованых памятників.
Кус скорше, ґрупа волонтерів, при спертю ЛАПіТ «Кычера» і Стоваришыня Маґурич, Стоваришыня Лемків і Музею Лемківской Культуры в Зындрановій провела ревітализацийны таборы і збірку жертв на ратуваня тамтышніх памятників. На жаль, не повело ся зобрати плянуваной сумы, але і за тоты жертвы орґанізаторы збіркы были вдячны.
На лабівскым теметові доднес заховало ся вельо камінных крестів, котры за більше як сімдесят років не были нияк ремонтуваны. Більшіст з них єст міцно пошкоджена. То остатній момент, жебы ратувати материяльны памяткы з давной Лемковины. Што основне, лабівскій цмонтір сам в собі становит надзвычайну памятку лемківской культуры, не лем в значыню духовой памяткы, але і в значыню сепулькрального кумшту.
Ґорлиці 106,6 MHz
Наш порталь можете чытати чысто дармо, але кєд маш охоту - можеш нас спомочы. Буде нам барз мило!
Жебы спомочы нас даком вплатом, без ниякых зобовязань, втисний притиск або зоскануй код QR.
Nasz portal jest darmowy, nie mamy (i nie chcemy) na nim reklam. Jeżeli masz ochotę - możesz wesprzeć naszą codzienną pracę.
Aby wspomóc nas jednorazową wpłatą, bez żadnych zobowiązań, kliknij przycisk lub zeskanuj kod QR.
