Придте на РутенАле / RuthenAle

В найвлизшый вікенд на Лемковині одбуде ся єдна з подій орґанізуваных Стоваришыньом Лемків – РутенАле – 13. Медженародне Бієнале Лемківской/Русиньской Культуры. Як сама назва вказує, проходит она што два рокы. Як раз едиция 2026 рока приносит дашто нове – другій ден подіі одбуде ся першыраз на обшыри ґміны Устя Рускє.

Добром традицийом каждого Бієнале єст тото, што участникы оддают найперше поклін вызначному родакови, Епіфанови Дровнякови – Никыфорови. І од того пункту зачне ся Бієнале – на креницкым цмонтери, де спочыват вызначный маляр.

Од самого же початку Никыфор был символом Бієнале – як творця, сын Лемковины, впертый, ідучый проти авторитарным рішыням власти. Іщы перед тым, о 10.00 год. в пенсийоні Мева засідала буде в Креници Світова Рада Русинів.

Одзначыня Епіфана Дровняка буде дальше і на креницкым дептаку, де участникы подіі положат квітя при його памятнику. Одтамале вшыткы, як єден хоровід, перейдут до Старого Здравничного Дому, де о 15.00 год. буде одкрытя выставы лемківскых/русиньскых творців. По тым буде інавґурацийный концерт, а на вечер, по перерві, іщы друга його част.

Того рока выступлят русиньскы артисты з: Польщы, Словациі, Украіны, Румуніі, Мадяр, Хорвациі і Сербіі.

І так як стоіт уж горі – 13. едиция подіі несе дашто нове. Отже, дотля было так, же дводньова подія в цілости проходила в Креници. Тепер же другій ден одбуде ся в Высовій. Є тото можливе при одкрытю на спілпрацу ґміны Устя Рускє і тамтышнього осередка культуры.

Друга част зачне ся в неділю (24. мая) о год. 13:30 зложыньом квітя при важным в лемківскій свідомости памятнику в Устю Рускым, якій – по змінах вымушеных ІНП – посвяченый єст тепер жертвам німецкого, совітского і комуністичного террору, як тіж памяти вшыткых погыбшых, страдавшых і потерпілых од політичных репресий жытелям Лемковины.

Пак подія перенесе ся до амфітеатру в Высовій, де о год. 14:30 буде мож выслухати прелекцию о русиньскій культурі. О 15:00 год. одбуде ся там фіналовый концерт.

Є іщы єдно нове – назва подіі была збогачена о доокрисліня РутенАле / RuthenAle – так жебы в русиньскым календари подій была она іщы ліпше асоциювана і вказувана не лем на утрырваляня, але і на модерный розвиток нашой культуры. Стоваришыня Лемків запропонувало і лоґо для подіі.