Припомянули собі жертвы Дуклі

В Словацькій републіці є 6-ый октобер памятным дньом. В календарі є зазначеный як День жертв Дуклі. Припоминать ся пєтным актом коло Памятника чехословацькых вояків на Дукельскім перевалі коло словацько-польской граніці в окресі Свідник.

До історії ся ту записали бої о стратеґічный ґеодетічный пункт 534, домінанту німецькой обороны северовыходні од міста Дукля. Тота історічна дія є знама як Карпато-дукляньска операція. Бої собі выжадали великы жертвы на людьскых жывотах, вмерло в них дватісяч чехословацькых вояків.

В четверь 6-го октобра у Свіднику і на Дуклі припоминала ся 72-га річніца Карпато-дукляньской операції, найвекшой гірьской баталії ІІ. світовой войны на выходнім фронті, і жертвы Дуклі.

Жертвы боїв Карпато-дукляьской операції, як інформує офіціалный сайт міста Свідник, того дня на Памятник чехословацькых вояків пришли собі учтити: председа влады Словацькой републікы Роберт Фіцо, міністер обраны Словацькой републікы Петер Ґайдош, началник ґенералного штабу Озброєных сил Словацькой републікы ґенерал Мілан Максім, делеґація з Ческой републікы під веджіньом намістника міністра обороны Чеськой републікы Томаша Кухты, представителі державной справы і самосправы Пряшівского самосправного краю, окресу і міста Свідник, представителі Словацького союзу протифашістічных бойовників, прямы участници боїв як і містны жытелі.

К участным пєтного акту приговорив ся на Дуклі председа влады Словацькой републікы Роберт Фіцо і міністер обороны Петер Ґайдош. Обидвоми выразили надій, же і молода ґенерація буде навщівляти такы пєтны місця і усвідомльовати собі, як тяжко родила ся свобода і кілько людьскых жывотів і проливаня крови стояла.

Далше пєтный акт продовжовав у Свіндику коло памятника армадного ґенерала Людвіка Свободы, де участным приговорив ся і пріматор міста Ян Голодняк. Тот при тій нагоді перевзяв од міністра обороны Петра Ґайдоша памятный металь ІІІ. ступня. Святкованя закінчіло ся коло Памятника Совітьской армады у Свіднику.

Карпато-дукляньска операція вступила до історії як найвекша і найкырвавіша битва лінії выходного фронту, котра є повязана з теріторійов Словакії. Войовали в ній войска Червеной армії і Чехословацького армадного корпусу ґенерала Свободы. В рамках Свободовой армады другов найвекшов народностнов ґрупов по Чехах были воюючі Русины, котры жертвовали свої жывоты за освободжіня і обновліня Чехословакії. Карпато-дукляньска операція мала злучіти повстанецькы силы Словацького народного повстаня із совітьскыма войсками, но стрітила ся з твердов протиатаков Німців в тяжкім терені. Операція проходила од 8-го септембра до 28-го октобра 1944-го року. Окрім двох тісячів чехословацькых вояків в ній  пришло о жывот 21 тісяч вояків Червеной армії. Теріторія, в котрій проходили найтяжшы бої, ся днесь зве Долина смерти.

Жрідло фотоґрафії: www.svidnik.sk
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА