Пришло нове – премєра лоґо ЛЕМ.фм

Медияльна ґрупа ЛЕМ.фм вводит новий систем візуальной ідентифікациі: нове лоґо, специяльні добраны кольоры, особливий значок. Через зміну ЛЕМ.фм хоче вказати, што фурт ся розвиват і глядат новых розвязань. Ідентифікацию зрыхтувало NUO Studio з Вроцлавя.

Новий систем візуальной ідентифікациі має быти помічным нарядьом в креуваню бренду ЛЕМ.фм. Є то постійний процес, котрий вымагат актуалізуваня. Коли ЛЕМ.фм зачало свою діяльніст, а было то перед семома (!) роками, было выключні інтернетовым радийом. Днес ЛЕМ.фм то радийо, котре дале мож чути по цілым світі через сіт інтернету, але тіж завдякы радийоволнам, клясичны радийоапараты передают сиґнал на Лемковині (106,6 MHz) та на заході в околицях Польковиц (103,8 MHz). Окрем радия, ЛЕМ.фм то штоденно актуалізуваний порталь та «Панрусиньскій Тыжденник ЛЕМ.фм+» і відеоканал ЛЕМ.фмTV на плятформі youtube. Розвиток мусіл досягнути тіж лоґо. Його ориґінальний вид запроєкутвал Давид Квока.

Нове лоґо єст результатом получыня в єдным символів гористого краєвиду Лемковины та інспіраций ґеометричныма взорами вышывок і кривульок. Конструкция лоґо основана є на квадраті. До той ґеометричной фіґуры одкликує ся тіж особливий значок, будучий елементом нового систему візуальной ідентифікациі.

Клікний в образок:

Значок є получыньом парох символів. Безпосередньо бере ся з ґеометриі вышывок на облечыню ци кривульок, заєдно навязує до конструкциі букв з лоґо і означыня крапкы. Посередньо символізує розходжыня ся радийоволн зо середины (Лемковина) на штырі страны світа (навязуючы в тот спосіб до розогнаных по світі Лемків). Через радийо доходит до єднаня ся цілой лемківской соспільности. Знимкы поміщены в значку сут штораз більшы – розходят ся, подібні як радийоволны.

До будуваня ґрафічных комунікатів ЛЕМ.фм окрислено три рівнорядны кольоры взяти з лемківского облечыня: синій (з ляйбиків), червений (хоснуваний при вышывках) та бронзовий (одкликуючий ся до чугы).

Авторками проєкту сут Аґнєшка Дашыньска та Маґдалена Фудалі з NUO Studio.