Продовжують в реконштрукції Любовняньского замку

Обнова Любовняньского замку продовжує. Як інформовала Леа Геілова з одділіня комунікації і пропаґації Уряду Пряшівского самосправного краю (ПСК), в найблизшім часі буде ся реконштруовати северовыходна стіна і третій двір.

Геілова інформовала, же ціла реконштрукція бы мала стояти понад 850 тісяч евр. Міністерство інвестіцій, реґіоналного розвитку і інформатізації Словацькой републікы на тот замір дало дотацію 800 тісяч евр, ПСК співфінанцує реконштрукцію сумов 51 тісяч евр.

В Любовняньскім замку находять ся експозіції Любовняньского музея, котрого є край зряджовательом. В екстерьєрі, під замком, є сканзен, де мож видіти деревяну архітектуру з реґіону, і з русиньскых сел, включно деревяной церькви.

Головным цільом проєкту є одстранити гаварійный стан, зреконштруовати і сохранити северовыходну стіну замку, зреконштруовати касарні із 17-го столітя і замковый студник – цістерну. Так само ся в рамках тых робот рахує і з археолоґічным баданьом, санаційов терену, одводніньом ці добудованьом замковой стіны з выужытьом автентічного матеріалу.

„Очекованый термін зачатку реконштрукчных робот є конець того року. Імплементація проєкту є напланована до 2024-го року,“ інформовала Геілова.

V зреконштруованых просторах Любовняньского музея – замку в Старій Любовні бы мала пак выникнути інтерактівна археолоґічна експозіція. Формов модерных технолоґій буде навщівникам презентовати автентічный жывот у воєньскых касарнях.

На третім дворі буде по реконштрукції сколярьскый двір, де буде цілорічна експозіція сколярів. „Буде ся ту вказовати соколярьске ремесло, буде ту AVES терапія, значіть робота з гендікепованыма навщівниками, будуть ту і творчі варштаты заміряны нелем на соколярьство, але і іншы ремесла як алхіміста, парфінер, коваль, робота зо зільом і подобно,“ доповнила.

Жрідло фотоґрафії: FB/Ľubovnianske múzeum.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА