Продуценты з реґіону Снины можуть здобыти дестіначну значку Полонины

Схосновати потенціал локалных продуцентів і додавателів служеб на благо розвитку турістічного руху в Полонинах має за ціль актуална вызва фундації Aevis і їй партнерів на уділіня дестіначной значкы.

„Навщівници, котры прийдуть до реґіону, можуть вдяка ній ідентіфіковати якостны продукты і службы, котры суть выроблены або выпестованы містныма людми з почливостьов ку традіціям і теріторії, в котрій жыють,“ повіла про аґентуру TASR о смыслі проєкту Зузана Бурдова з фундації Aevis.

Полонины – нереално реалны

Як на своїм вебсайті regionpoloniny.sk пишуть ініціаторы проєкту, дестіначна значка Полонины з підтітулом „нереално реалны“ презентує різны шпеціфікы, котры мож в найсеверовыходнішім куті Словакії видіти, зажыти або окоштовати.

Підтримує так само всокочіня і утриманя автентічной природы, културы, традіцій і ремесел. Головным цільом є посередництвом утримательного розвитку реґіону притягнути до Полонин любителів природного турізму. „Днесь вже люди глядають іншы дестінації як переповнены природны актракції, якыма суть Татры або Доновалы,“ повіла Бурдова з тым, же „нереално реалныма“ суть в Полонинах наприклад парк темного неба, деревяны церькви ці зубры.

Робити з почливостьов ку традіціям

Дестіначну значку в актуалній вызві можуть здобыти выробцьове і продуценты земледільскх продуктів, потравинарьскых і традічных ремеселных выробків, як і додавателі укравтельованя, стравованя або зажытковых служеб.

Подля Бурдовой іде о то, жебы то тоты люди робили з почливостьов ку традіціям і теріторії, на котрій жыють. Наприклад про того, кто забезпечує стравованя, є условієм про здобытя дестіначной значкы, жебы варив з реґіоналных потравин, мав в їдалнім листку даяку традічну реґіоналну страву, як суть татарчаны пирогы або голубкы, але важным є і то, жебы сепаровав одпад.

Жадость о уділіня дестіначной значкы треба подати до 15-го юна 2020-го року і жадатель мусить быти з дестінації Полонины. „Тота (дестінація, позн. ред.) односить ся на цілый окрес Снина включно сел околіці – Руськый Грабовець, Руська Быстра, Підгородь, Бенятина і Іновець з окресу Собранці,“ доповнюють авторы вызвы.

Партнерами фундації Aevis в проєкті суть місто Снина, Областна орґанізація турістічного руху Вышній Земплін і Вышній Шаріш, Справа Народного парку Полонины і Frankfurt Zoological Society.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА