Проф. Олена Дуць-Файфер новом ведучом Східньоевропейской Комісиі Польской Академіі Знань. Ґратулюєме

З узнаньом інформуєме, што новом ведучом Східньоевропейской Комісиі Польской Академіі Знань остала др габ. Олена Дуць-Файфер, проф. ЯУ. Бадачка од років звязана єст з роботами Комісиі, в остатнім часі тіж в функциі секретаря. На функциі ведучого вычеряла др. габ. Анджея Зємбу.

Проф. Олена Дуць-Файфер то цінена вчена, специялизуюча ся в літературознавстві і студиях над лемківском культуром і языком. Єй науковый доробок і досвідчыня в реализациі інтердисциплінарных проєктів вписуют ся в місию Комісиі та Польской Акадаміі Знань.

Східньоевропейска Комісия ПАЗ была основана в 1993 році, а єй попередничком была основана два рокы скорше Центральноевропейска Комісия. Комісия єст частю Історично-Філолоґічного Выділу.

Головны обшыри діяльности Комісиі обнимают баданя на державами Східньой Европы – особливо Білоруси, Росиі і Украіны – в контексті іх істориі ци сучасных проблемів. Комісия занимат ся шыроком тематиком, од археолоґіі, через історию, языкы, писменництво, реліґію, штуку, аж по політолоґію і социйолоґію.

Публикациі посвячены Лемкам

В рамках діяльности Комісиі орґанізуваны сут науковы сесииі, выдаваны науковы опрацуваня, так вельо- як і монотематичны, як напр. «Лемкы і лемкознавство в Польщы» ци «Формулы патріотизму в Східній і Центральній Европі од нового часу до сучасности» під ред. А. Зємбы.

Авторства новой ведучой Комісиі, проф. Олены Дуць-Файфер єст популярна і єдина така літературознавча моноґрафія, котра тыкат текстовой спадковины Лемків – «Лемківска література в другій половині ХІХ і на початку ХХ ст.». Інча публикация, яка вышла в рамках Робіт Східньоевропейской Комісиі, то публикация «Етнічно-нацийональны квестиі на пограничы східньой і західньой Славяньщыны. Русиньскій рух на Словациі, Украіні і в Польщы» авторства др Евы Міхны.

Польска Академія Знань

Польска Академія Знань то престіжна наукова інституция о вельолітній традициі, котрой корені сігают 1872 рока. З сідибом в Кракові, ПАЗ одгрыват основну ролю в розвитку польской наукы, підпераючы інтердисциплінарны баданя, науковы публикациі і медженародну спілпрацу. Академія зосереджат выдатных вченых з Польщы і заграниці. Є плятформом выміны знань і досвідчынь.