Проґрам Театру Александра Духновіча в Пряшові на місяць май 2026

5-го мая 2026

Пісковиско (Мала сцена, 19.00 год.)

Коли доростаме? І што то властно дорослость є? І є властно жадана в добі гіперреаліты, коли уж не мож точно повісти, што є досправдове і што фіктівне? Коли перебераме зодповідность за властны чіны? Докажеме дати явно знати свої чувства? Тужыме іщі по тырвалых односинах? Не сьме і в дорослости все дітми і в дітинстві дорослыма? Суть ВІН і ОНА іщі досправдовы, або то вже лем знакы у віртуалнім світі? Найліпша пєса (гра) 21-го столітя про двох акторів (грачів).

6-го мая 2026

На ревізію (Велика сцена, 19.00 год.)

Остра сатірічна комедія о жывоті і роботі сільского старосты і о тім, як рішыв проблемы сільскых людей. В пєсі найдете достаток гумору і музикы, як і выпитой водкы і глубокого значіня. Пєса є приступна молодежи од 16 років.

7-го мая 2026

Щастна выгра (Велика сцена, 19.00 год.)

Шалена комедія із сучасности о небезпечні силній тузі за ліпшым жывотом. За щастьом і грошами. Нова історія манжельской пары Надежды і Бориса (познатых із комедії Детектор лжи), котры знова пережыють невіроятный вечур у своїм обычайнім панелаковім квартелю. Бо Надежді і Борисови сповнив ся сон: выграли астрономічну фінанчну суму в лотерії. Конечно суть богаты! Конечно перервуть рабскы ланцы, котры звязують їх нудны жывоты. Конечно Всевышній выслухав молитвы Надежды, і послав їм выгру, котру нихто не чекав. Святкованя выгры тырвало цілу ніч. Але рано ся солодкый сон мінить на кошмар. Выгерный тікет пропав. Просто счезнув. Або го якыйсь завистник вкрав?

13-го мая 2026

Продавач доджу (Велика сцена, 19.00 год.)

Додж не мож купити. Але то не значіть, же го хтось не може продавати. Є літо, сухо, і якраз заевідовали далшый рекорд в теплотах. Коло вашых дверей появить ся чуджій чоловік, котрый вам понукать додж. На продай. То подводник. Шарлатан? Або спаситель?

14-го мая 2026

О шкодливости табаку (Мала сцена, 19.00 год.)

Скапчаня єдноактовкы Чехова з назвов О шкодливости табаку з його ранніма гуморесками подає траґікомічну боязливу сповідь курячого з пасії – Івана Івановіча Нюхина, колись сниючого о великых ділах, а днесь нещастного боягуза, тіпічного хлопа під папучов, сниючого о выслободжіню спід надвлады свойой деспотічной жены, але ку тому може помочі лем чудо.

15-го мая 2026

Што ся стало зо женов? (Мала сцена, 19.00 год.)

Кедь ся із любви стане анекдота, а із ставкы вопрос жывота і смерти. То театер в театрі. Театер о жывоті. Жывот в театрі. Множество траґікомічных історій о таємній жені, котры собі трьоми кочовны акторы грають, жебы скоротити час десь на розпутю… Іріна Бікуліна – красна, таємна, люблена – існує навікы в споминах як міфічна „femme fatale“. Каждый із них єй „познав“. Каждый із них єй хотів мати про себе. А предсі їх доказала досконало несподівати. Ґротесковы мылкы і філозофічна ставка о ціні людьского жывота капчають ся до чеховско точной траґікомедії о марнивости, страху і чеканю на чудо. Сміх ту болить. А тихо на кінцю іщі веце.

22-го мая 2026

Справа безсмертность (Велика цена, 19.00 год., 1-ша премєра)

Што значіть старіти в добі, котра старіня одмітать, або свідомо вытискать? Сценічный діалоґ меджі на єднім боці образом себе як тіла, котре мож управльовати, омолоджати і продовжовати його жытя, і на другім боці тихым, несмілым голосом автентічной ідентіты, котрый в тиску ідеалів счезать.

28-го мая 2026

Бідов о землю! (Велика сцена, 19.00 год.)

Траґічна історія пристрастной любви, ревности і маніпулації вказує, як зранене сердце може змінити ся на загыбель. Молода Маруся тужыть по любви Гриця, но інтріґы, недорозуміня і властна пыха єй поступно ведуть до фаталного рішіня. Тото, што почінать як невинне змаганя о чувства, кінчіть нечеканов траґедійов. Силна людова драма о тім, же любов без довіры може принести веце болісти як щастя.

29-го мая 2026

Детектор лжи (Велика сцена, 19.00 год.)

Повісте собі, же о манжелстві знате вшытко? Досправды то так є? Або… може о манжелстві не знаме абсолутно нич? І манжелство може быти єдна велика незнама… А притім прекрасна комедія! Находиме ся в обывачці єдного класічного панелакового квартелю. Пані Надежда не знать найти одповідь на вопрос: Де мій муж Борис скрыв выплату? І так собі на поміч закличе домів гіпнотізера. Має пояснити справы, котры суть на першый погляд баналны. А пізніше і фаталны. Бо уж по хвілі знайде ся меджі небом і земльов. Ліпше повіджено – посеред таємніць тридцятьрічного манжелского одношіня. Тадь хто бы ся сперав покушіню спознати істинну правду і скрыты світы свого ціложывотного партнера? Нихто. І втогды ся іщі лем почнуть діла! Минулость шокує нашых героїв, метать їх до неочекованых сітуацій. Но публіка ся барз файні бавить! Та ці то в жывоті аж така перемога? Дізнати ся о нашых близкых досправды вшытко? Тверду правду? Як скінчіть тота сеанса несподіванок? Подарить ся загасити тот ґротесковый пожар манжелскых боротьб? Буде годен в многім простодушный гіпнотізер втечі із пазурів манжелского абсурду? Так лож, як і туга розкрыти правду, єдно і друге може быти про нас солодков наркотіков, котра ся за секунду змінить на смертну отрову. Успішній комедії зо сучасности домінують брілантны акторьскы выконаня протаґоністів русиньского театру. Суть поставлены на текстовій і сітуачній перемінливости. На бавліню ся. На дінаміці акторьской кооперації, іскривости словных несподіванок. Значіть! Театралный вечур повный доброй забавы, усміху, котрый вам з часу на час замерзне на роті, сміху і радостного обчутя ся може зачати!

Выступліня ТАД мімо Пряшів

3-го мая 2026
На ревізію (Културный дім Бехерів, 16.00 год.)

12-го мая 2026
Щастна выгра (Містьскый културный центер Гуменне, 19.00 год.)

17-го мая 2026
Руковины на Гончарівці (Културный дім Полата, 17.00 год.)

Oдарка цілый час вадить ся із своїм мужом, бо Прокіп пє. Кедь їм запропонують оддати свою дівку Уляну за дурного Стецька, згодны суть, бо тот є холем богатый. Але сердце Уляны вже давно здобыв собі бідный Олексій. Руковины ближать ся, но як ся бісідує, сердцю не розкажеш. Што выдумать залюблена пара, жебы планы родічів не зопсули їх щастя? Пєса україньского прозаіка і драматурґа Григорія Квіткы-Основяненка днесь належыть меджі класіку. На першый погляд легка комедія о любви одкрывать важны вопросы о рівности людей, о родинных односинах але і о значіню простого людьского щастя.

24-го мая 2026
Учітель (Културный дім Завада, 17.00 год.)

Кедь до малого гірьского села прийде новый учітель, є так дакус підозрілый. Хто бы чекав, же учітель хоче учіти? Тадь тот старый старав ся о свою загороду, і людям дав святый покій. Проти молодого ентузіасты, котрый быв як некомфортный переложеный уж восьмый раз, такой поставить ся староста і містный оліґарха. Тот тягать за ниткы іщі і на урядах в місті. А з нима і ціле село. Жадны новы маніры ту не допустиме, і кебы сьме мали од глупоты вмерти! Комедія Учітель україньского класіка Івана Франка аж підозріло точно описує сітуації, котры знаме і мы. Авторітами суть часто люди, котры бы нима нияк не мали быти, і спохыбньованя освіты є про нас повсякденнов маннов. Но із темноты веде лем єдна путь. Выкрочіме на ню?

26-го мая 2026
Полепетко (Културный дім Свідник, 16.00 год.)

Музикална приповідка Петра Столічного з текстами співанок Яна Штрассера і музиков Іґора Базліка приносить забаву, гумор і смішны сітуації, до котрых діставать ся головный герой Полепетко, што поплете вшытко.

11-го мая 2025
Головный тарабанщік (Културный дім Вышня Ядлова, 18.00 год.)

Пєсу Головный тарабанщік Александер Духновіч написав у 1852-ім році, но темы, котры в ній одкрывать, суть веце як актуалны. Тадь припады здобыти функцію ці тітул не найчестнішыма способами видиме і днесь. Любов двох молодых людей все належыть до тых найчістішых чувств. Почливость до родічів є моралным імператівом. А рівноправность каждого чоловіка, каждого народа, доднесь не є вырішеным, закінченым ділом.

31-го мая 2026
На ревізію (Културный дім Баєрівці, 17.00 год.)