Пряшівскый самосправный край (ПСК) в тім році розділить в рамках свого проґраму дотацій 4 міліоны евр. Інформовала о тім Івана Ондріова з Одділіня комунікації і пропаґації ПСК.
Жадателі можуть о підпору жадати в трьох проґрамах: Вызва про реґіон, Вызва председы ПСК і Мікропроґрам ПСК. О ґрантовы грошы можуть жадати села і міста, реґістрованы церькви, реліґійны общества, безпрофітовы орґанізації, обчаньскы здружіня, подникателі і юрідічны особы, котрых основательом є ПСК.
В актуалній Вызвы про реґіон вырішыли крайскы депутаты о алокації 2,4 міліона евр, і то в штирьох порґрамах.
Іде о підпору проєктів біціґльового транспорту і біціґльового турізму, де приділили 800 тісяч евр, підпору обновы културных памяток UNESCO і народных културных памяток, на што є приділеных 580 тісяч евр, підпору будованя і реконштукції шпортовых ареалів, на што схвалили 800 тісяч і підпору підниманя якости в соціалных службах і паліатівній здравотній старостливости зо сумов 220 тісяч евр. Термін на передкладаня жадостей в тій вызві є од 15-го яанура до 31-го марца 2021-го року.
На фінанцованя проєктів на підпору публічного жывота міст, сел, здружінь обчанів підуть грошы і з вызвы Мікропроґрам ПСК і Вызвы председы ПСК. Схемы суть выголошены в трьох проґрамах – Шпорт, Култура і Соціалны службы.
Цілкова сума в рамках вызвы Мікропроґрам ПСК представлює 1,28 міліона евр, причім мінімална дотація є 700 а максімална 10 тісяч евр. На Вызву председы ПСК было схваленых 320 тісяч евр. Там є мінімална сума дотації 1000 а максімална так само 10 тісяч евр. Жадости при обидвох споминаных вызвах є треба загнати в терміні од 15-го до 28 фебруара того року.
Успішны жадателі будуть мусити свої підпорены проєкты зреалізовати до 31-го октобра того року. Веце інформацій мож найти на офіціалнім сайті ПСК в секції Вызвы і ґранты.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі