Пряшівскый архієпіскоп зрядив Гуменьскый вікаріят

Пряшівскый ґрекокатолицькый архієпіскоп і метрополіта Словакії Ян Бабяк на Святый і великый четверь, 13-го апріля 2017-го року, зрядив новый Гуменьскый архієпархіялный вікаріят із центром в Гуменнім. За першого гуменьского вікаря меновав отця ТгЛіц. ПаедДр. Мартіна Злацького, пароха ґракокатолицькой парохії Успенія Пресвятой Богородіці в Гуменнім і протопресвітера гуменьского протопресвітерату. Архієпіскоп то оголосив на кінцю святочного богослужіня в Катедралнім соборі св. Йоана Крестителя в Пряшові, на котрім брало участь веце як двасто священиків цілой архієпархії. Інформовав о тім офіціалный сайт пряшівской архієпархії.

В декреті 1230/2017, котрым метрополіта зрядив новый вікаріят, ся пише, же так зробив ведженый старостливостьов о йому звірену церьков, жебы мала ку діспозіції вшытко, што є потрібне про здобытя штонайвешкого духовного добра і про найдалекішы парохії Пряшівской архієпархії.

Новый вікарь буде в рамках свого вікаріяту душпатырьскы справовати теріторію, буде робити візітації парохій, по пораді із метрополітом скликовати дні священиків, засіданя протопресвітерів, літурґічны святкованя ітд. Буде брати участь на літурґічных празднованях і робочіх стрічах Пряшівской архієпархії, пропоновати выміны священиків на парохіях і раз за квартал буде реферовати о вікаріяті. Гуменьскый вікарь має право носити крест із окрашіньом, набедерник і мітру. Так само дістав задачу дозоровати будованя новой будовы вікаріяту в Гуменнім.

Теріторію нового Гуменьского архієпархіялного вікаріяту творять протопресвітераты: Гуменне, Ганушівці над Топльов, Міджілабірці, Снина, Стропків, Воронів над Топльов і Воронів над Топльов – Чемерне. Молодежный центер Барка в Юсковій Волі зіставать під юрісдікційов Пряшова.

Новый вікарь буде інтронізованый до свого уряду на Світлый понедільок, 17-го апріля 2017-го року, о 9.00 год. при архієрейскій літурґії. Інтронізованый буде метрополітом.

Поділена русиньска теріторія

Русиньскы актівісты, головно із Общества святого Йоана Крестителя, орґанізації, котра зробила вже множество літурґічных тлумачінь на русиньскый язык, якы ся хоснують, довгы рокы жадають Пряшівску архієпархію о єпіскопа, котрый бы мав на старости душпастырьство Русинів. На тоты пожадавкы дотеперь не пришла позітівна одповідь. Навспак, зряджіньом нового вікаріяту ся реално ділить теріторія, котра є населена Русинами.

Покля протопресвітераты Міджілабірці, Снина, часточно і Стропків а Гуменне, в котрых суть села, де ся люди голосять ку Русинам, ідуть під юрісдікцію Гуменьского архієпархіялного вікаріяту, під Пряшовом зістане Свідник, Бардейов, Стара Любовня, де суть так само села із русиньскым жытельством.

Жрідло фотоґрафії: grkatpo.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА