Пряшівскый край дале веде в списованю жытелів

Кількость списаных жытелів Пряшівского краю підняла ся на 90,8 процента. В Пряшівскім краю ся од зачатку асістованого списованя списало 68 466 жытелів і край тым далше веде в асістованім списованю в рамках цілой Словацькой републікы.

У віторок 2-го юна о тім інформовала говоркыня Списованя жытелів, домів і квартелів 2021 Ясміна Штаудер. Інформацію принесла аґентура TASR.

Асістоване списованя в Пряшівскім краю найскоріше іде допереду в селі Ломнічка. Другым найліпшым селом є русиньска Ціґелька. На другім боці суть села, котры мають найменше списаных, конкретно Ленартів із 66 процентами, і русиньска Вышня Яблінка, де є затля списаных 68 процент людей.

Як повіла Штаудер, хоць асістоване списованя суть на Словакії і села, котры мають іщі і теперь під 50 процент списаны. Суть то села з вылученыма соціалныма комунітами.

Асістоване списованя зачало на Словакії 3-го мая 2021-го року, закінчіть ся 13-го юна. Хоснують го тоты, котры ся не годны были самосписати. У четвертім тыждню асістованого списованя ся цілкова кількость списаных на Словакії підняла на 5,09 міліона жытелів. З того асістовано ся затля списало 247 тісяч людей. Самосписало ся 86 процент населіня.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА