Пряшівскый край підпорив проєкты в реґіонах за 1,28 міліона евр. Найвеце ішло на културу

Першу тогорічну суму грошей до реґіонов з крайскых дотачных схем в понедільок 3-го мая 2021-го року схвалили депутаты Пряшівского самосправного краю (ПСК). Цілково підпорили 478 жадостей в проґрамах Шпорт, Култура і Соціалны службы в сумі 1,28 міліона евр.

Як інформовала Леа Геілова з Одділіня комунікації і пропаґації ПСК, схвалены дотації были в рамках Вызвы Мікропроґрам ПСК.

„Тот проґрам фунґує і вдяка депутатам і взаємнодіяню того, же сьме пустили пінязі і про меншы проєкты, ці уж то суть културны, шпортовы ці зо соціалной области. Цілково сьме підпорили 478 проєктів. Я пересвідченый, же тоты дотації досправды поможуть в даякім смыслі рушыти допереду жывот в тых областях в окремых окресах, селах і містах. Я радый, же сьме таку форму підпоры не заставили і можеме помочі в оддаленішых частях нашого краю,“ повів председа Пряшівского самосправного краю Мілан Маєрьскый.

Найвеце грошей ішло до културы. Край в тій области підпорив аж 286 жадостей в цілковій сумі понад 719 тісяч евр. Дотації жадателі схоснують на будованя, реконштрукцію і модернізацію културных і сакралных памяток, але і на їх оправы і утримованя.

Но так само ся дотації схоснують на нематеріалну културну дідовизну, значіть на орґанізацію културных подій, єднако і на підпору фолклорных колектівів і ґруп ці на выдавательску діялность.

До Вызвы Мікропорґрам ПСК цілково пришло 592 жадостей, з того крітерії не сповнило 17 з них. 114 жадателів не было підпореных.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА