Пряшівскый край у списованю заоставать. Даны пришли з малых русиньскых сел

Найрозсягліше штатістічне здобываня даных на Словакії, проєкт Списованя населіня, домів і квартелів 2021 закінчіло ку 31-му авґусту 2020-го року спомеджі вшыткых 665-ох сел в Пряшівскім самосправнім краю лем 12. Інформує о тім пресаґентура TASR. З них сім є русиньскых.

Із 34-ма процентами списаных квартелів край заоставать за ціслословацькім середнім чіслом, котре ся ближыть ку 50-ом процентам. Тото выходить із інформацій, котры медіям подала говоркыня Штатістічного уряду Словацькой републікы про Списованя населіня, домів і квартелів 2021 Ясміна Стаудер. Як доповнила, проєкт вже теперь помагать самосправам становльовати їх далшый розвиток.

„Кедь комплетно наповниме датабазу даных, зробиме аналізу і на основі резултатів вырішыме, з чім зачнеме. В каждім припаді бы мало быти реалізоване будованя арендованых квартелів і інфраштруктура,“ повіла Марія Валлушова, повірена списованьом в місті Кежмарок, котре має вєдно із Сабіновом спомеджі міст над 10 тісячів жытелів в рамках краю найвеце уж списаных кавртелів.

Компелтне списованя зробило і закінчіло 12 сел. З них сім русиньскых, конкретно Дубова, Гавранець, Кружльова, Кална Розтока, Михайлів, Паризівці і Сольник.

Актуалне списованя є першов фазов проєкту Списованя населіня, домів і квартелів 2021, почас котрой ся аж до 12-го фебруара 2021-го року списують домы і квартелі. В другій фазі, од 15-го фебруара до 31-го марца, будуть списовати ся жытелі. Фурмуларь буде мати 14 вопросів. Люди будуть годны приголосити ся ку своїй народности і материньскому языку.

Жрідло фотоґрафії: Rádio Patria – Študio Košice.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА