ПСК добудує далшу ціклостежку меджі русиньскыма селами в Полонинах

В Полонинах добудує ся далша біціґлиова стежка. Іде о веце як штири кілометрів довгу трасу од села Влыч по село Кривый.

Як інформовало Одділіня комунікації Пряшівского самосправного краю (ПСК), край підписав контракт на фінанчну дотацію з Міністерсвом інвестіцій, реґіоналного розвитку і інформатізації Словацькой републікы, котре проєкт зафінанцує.

Проєкт є в сумі 1,64 міліона евр. Споминана траса є єднов з трьох, котры Пряшівскый самосправный край добудує іщі в тім році. Траса ціклостежкы Влыч – Кривый є далшов етапов ціклоокругу Poloniny Trail. Край співфінанцує проєкт пятьома процентами.

Через облюблены дестінації

„Я радый, же і наперек комплікаціям почас послідніх трьох років приправ доказали сьме сповнити вшыткы условія поданя проєкту і контракт, котрый проєкт зафінанцує, маєме підписаный,“ повів председа ПСК Мілан Маєрьскый.

За словами пряшівского жупана актуално буде проходити процес контролі публічного обстараваня на зготовителя ставбы на резорті інвестіцій, пак здобуде контракт платность. Наслідно може будованя од Влыча по село Кривый зачати.

Траса меджі Влычом і Кривым веде з містной комунікації по лівім берегу Збойского потока, наслідно ся перейде через деревяну лавку на правый берег, і продовжує трасов бывшой лісной узкоколяйной штрекы.

Напланована є коло Збойского потока до села Влыч. Піде коло турістічно облюбленых дестінацій, через водну перегороду на ріці Улічка, і цілкова довжка є понад штири кілометры.

В плані і далшы трасы

ПСК приготовлює до реалізації і далшы части Poloniny Trail. Конкретно меджі Рунинов і Кривым, так само меджі Влычом і Калнов Розтоков, як і перекапчаня трас на Стащіньску Розтоку. Тыма трасами ся цілый ціклоокруг, котрый буде мати по докінчіню 86 кілометрів, запре.

„Округ Poloniny Trail, котрый капчать села народного парку і його унікатны місця, але і деревяны церькви а тутешню природу, наберать реалны контуры і мене тішыть, же уж штохвіля через першы докінчены проєкты ціклотрас даме турістаме, котры ту завітають, обіцяный нелем шпортовый, но і природный а културный зажыток,“ доповный Маєрьскый.

Атрактівный проєкт ПСК Poloniny Trail має підняти потенціал Полонин і помочі ку розвитку турізму в тій части краю. Ідея будованя біціґльовой інфраштруктуры вышла з выступів ініціатівы Catching-up Regions, котру ПСК імпелемтує од 2018-го року. Вдяка тій ініціатіві в окресі Снина проінвестує ся до кінця того року понад 15 міліонів евр.

Позначка: Села Влыч і Кривый в статі записаны суть подля нового списку народностных сел і міст, котрый є платный од 1-го марца 2023-го року. Зміна з Уліч на Влыч а Уліч-Кривый на Кривый настала по конзултації з містныма жытелями, жебы їх села записовали ся офіціално так, як їх самы называють.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА