ПСК і Малопольске воєводство обговорили в Кракові далшы сполочны проєкты

Малопольске воєводство і Пряшівскый самосправный край (ПСК) капчать довгорічна співпраца в різных областях. Далше прямованя той співпраці приближыла недавна стріча партнерьскых реґіонів у Кракові.

Як інформовала Даша Єленьова, говоркыня ПСК, обидві стороны єй видять головно у сфері транспорту, путницького турізма і в біціґльовім транспорті. В пятніцю 8-го новембра 2024-го року вєдно одкрыли і далшы можливости співпраці, од выставы творів Енді Варгола в Кракові і реалізацію сполочных вытварных пленерів, через путницькый турізм аж по обнову Україны.

У співпраці хотять продовжати

„Пряшівскый самосправный край видить Малопольске воєводство як силного, сполягливого і стабілного партнера, і нашы взаємны односины роками іщі веце проглублюють ся,“ повів пряшівскый жупан Мілан Маєрьскый по стрічі. Припомямнув, же польскый партнер поміг ПСК і минувшого року по землетрясіню сумов 222 тісяч евр на одстороніня шкод.

Реґіоны Пряшівского самосправного краю і Малопольского воєводства мають за собов шырокый спектрум публічно-хосенных проєктів зреалізованых головно з европскых фінанцій. Вдяка успішным жадателям інвестовали ся посередництвом проєктів грошы до пригранічных теріторій із обидвох боків граніці.

„Наша дотеперішня співпраца проходить барз добрі і хочеме, жебы продовжала. Довгы рокы нас капчають сполочны цілі. Залежыть нам на ефектівнім транспорті на обидвох боках нашой сполочной граніці, на добрій співпраці в области турістічного руху, на творіню новых можливостей про турістів, котры нас навщівлюють, а тым і новых робочіх місцях, і на далшім економічнім розвитку. Мы все одкрыты про співпрацу, і в крізовых сітуаціях, коли потрібна є взаємна поміч,“ повів по стрічі маршалок Малопольского воєводства Лукаш Смулка.

Драгы і Варгол

Пріорітами черезгранічных партнерів на далшый період зістали драгы і будованя ліпшой і безпечной інфраштруктуры транспорту. В рамках тых пріоріт буде ся наприклад далше будовати і розвивати біціґльова стежка Eurovelo 11.

В области школства хотять обидві стороны надвязати на тогорічны успішны умелецькы пленеры зорґанізованы про штудентів середніх умелецькых школ. Сполочным выступом співпраці в области културы має быти приготольована выстава творів Енді Варгола в Малопольскім центрі наукы Cogiteon. Реалізовати ся має в першім кварталі 2025-го року у співпраці з Музейом модерного уменя Енді Варгола в Меджілабірцях.

На державній уровни є сполочным цільом обидвох реґіонів европске зґрупованя Euromontana ці підпора приправы Карпатьской стратеґії на уровни Европской комісії.

„Здружіня Euromontana може в будучности принести великы выгоды як про Малополське воєводство, так і про Пряшівскый край. Меджінародна співпраца є ключовов при роботі на стратеґіях розвитку, і потрібна про рішіня проблем, котры мусять рішыти гірьскы реґіоны в Европі,“ повів малопольскый віцемаршалок Вітолд Козловскый.

Співпраца меджі ПСК і Малопольскым воєводством одштартовала 14-го октобра 2003-го року підписом договору на Любовняньскім граді.