ПСК має схвалены новы черезгранічны проєкты з Польщов за 4,5 міліона евр

Пряшівскый самосправный край (ПСК) актівно залучать ся до діяня в польско-словацькім пригранічу. Вдяка Проґраму черезгранічной співпраці Interreg Польща – Словакія 2021 – 2027 буде годен схосновати майже 3,9 міліона евр на актівности, котры будуть будовати співпрацу меджі інштітуціями і жытелями приграніча.

Інформовало о тім Одділіня комунікації ПСК, котре єдночасно додало, же схваленый быв і проєкт Справы і утримованя драг ПСК. Тота крайска компанія на оправу драгы Лыса Поляна проінвестує понад 600 тісяч евр.

Зліпшіня жывота в пригранічных областях

Пряшівска жупа має схвалене фінанцованя новых проєктів, котры суть заміряны на укріпліня інштітуціоналной співпраці і модернізацію драг.

Посередництвом Фонду малых проєктів іде о актівность з назвов Вєдно в пригранічу в сумі 3,88 міліона евр з Европского фонду реґіоналного розвитку. Цілковы кельчікы проєкту заміряного на будованя взаємной довіры і пропаґацію акцій тіпу люде людям суть притім 4,85 міліона евр.

Його цільом є інтеґрація пригранічных областей і зліпшіня якости жывота жытелів пригранічных областей, і то через імплементацію малых проєктів. Їх приймателі будуть мочі реалізовати такзваны мягкы проєкты, котры дотуляють ся многых областей жывота як є освіта, еколоґія, култура, уменя, шпорт, актівный одпочінок, традіції ці господарьска співпраца.

Пряшівскый самосправный край приготовить школіня і конзултації про потенціалных жадателів малых проєктів. Реалізація проєкту бы мала тырвати штири рокы. Плановане выголошіня першой вызвы з Фонду малых проєктів очекує ся на переломі місяців септембер і октобер 2023-го року.

Робити ся будуть і драгы

Европскы фінанції з Interreg-у уможнять і реконштрукцію драг на трасі Лыса Поляна, і то як на польскім, так і на словацькім боці. Фінанцованя было схвалене в рамках вызвы про черезгранічны драгы, котра была заміряна на актівность з назвов Зліпшіня якости інфраштруктуры драг черезгранічного тіпу при взятю до увагы аспектів утримательного транспорту.

Проєкт із схваленым фінанцованьом Европского фонду реґіоналного розвитку про обидвох партнерів є в сумі 1,97 евр, з того про ПСК піде приблизно 609 тісяч. На польскім боці бы ся мала модернізовати драга, котра капчать село Буковина Татраньска з гранічным переходом в Лысій Поляні, а в Пряшівскім краю драгы III. класы.

Цілково іде о 4,76 кілометрів драг, причім на словацькім боці оправить ся 1,5 кілометра. Зо закінчіньом проєкту рахує ся в 2025-ім році.

Фінанцованя споминаных проєктів Пряшівского самосправного краю в рамках Проґраму Interreg было схвалене почас IV. засіданя Моніторінґового комітету, котре проходило 26-го і 27-го юна 2023-го року в Бардейовскых Купелях.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА