ПСК схвалив далшы еврофонды і до русиньскых реґіонів

В понедільок 4-го мая 2026-го року одбыло ся 22-ге засіданя Рады партнерства Пряшівского самосправного краю (ПСК). Як інформовала говоркыня ПСК Даша Єлєньова, засіданя принесло схваліня новых проєктовых замірів інтеґрованых теріторіалных інвестіцій.

Суть в цілковій сумі 3,8 міліонів евр і суть прямованы на модернішы културны обєкты, якостніше школство, але наприклад і на ревіталізацію історічных обєктів.

„Жупны еврофонды суть про нас ключовым і адресным інштрументом. Не інвестуєме од стола, але точно там, де пріматоры і старостове найвеце потребують поміч про зліпшіня жывота у своїх містах і селах,“ повів председа ПСК Мілан Маєрьскый.

Вдяка механізму інтеґрованых інвестіцій край наштартовав масівну підпору про найменшы села до 500 жытелів. Межі підпореныма малыма селами суть теперь і русиньскы Баєрівці ці Тополя.

Жупан Маєрьскый спомянув, же Рада партнерства ПСК схвалила і приблизно 10 міліонів евр на каналізацію і водовод в селі Збой.

Схваленый проєкт міста Свідник в сумі 359 тісяч евр із грошей Европского фонду реґіоналного розвитку забезпечує рішіня на затримованя воды посередництвом комплексной ревіталізації просторів про оддых і пішый рух на Уліці 8-го мая. Локаліта ся має змінити на парково-оддыхову зону із лавочками, освітліньом а фонтанками на питну воду. Вытворити ся має і доджова загорода.

В сусіднім окреснім місті – Стропкові, буде продовжовати четверта, єдночасно завершальна обнова головной площі.

Рада партнерства ПСК інтензівно працує на наповньованю фінанчной алокації із Проґраму Словакія, котра є про Пряшівскій край встановлена на уровни 293 міліонів евр. Актуално є схваленых уж 92 процент алокації, іде о 257 проєктовых замірів в сумі 270 міліонів евр.

В схвальованю проєктів фінанцованых із жупных еврофондів належыть Пряшівскый самосправный край меджі найактівнішы крайскы самосправы, інформовала Єленьова.