ПСК успішный в проґрамі ENI. Зреалізує пять проєктів за 2,4 міліоны евр

Пряшівскый самосправный край (ПСК) быв успішный в третій вызві черезгранічной співпраці ENI (Euroepan Neighbourhood Instrument) меджі Мадярьском, Словакійов, Румунійов і Українов.

Із 30-ох схваленых проєктів на теріторії ПСК буде реалізовати ся пять замірів в цілковій сумі майже 4 міліоны евр. З той сумы будуть партнеры краю фінанцованы сумов майже 2,4 міліоны. Інформовала о тім Леа Геілова із Одділіня комунікації і пропаґації ПСК.

Продовжує ся в реконштукції драг

Найуспішнішым проєктом є PREZAK 2 – Модернізація транспортного споїня меджі ПСК і Закарпатьсков областьов Україны. Іде о продовжованя реконштруцкії драг в рамках проєкту з першой вызвы ENI – PREZAK. Головным партнером проєкту є Справа і утримованя драг ПСК.

На словацькім боці зрекноштруує ся драга в довжці понад 3,3 км меджі русиньскыма селами Тополя  – Колбасів, і розпутьов Колбасів – Руськый Потік, што є частьов драгы першой класы, котра іде ку гранічному переходу Убля – Малый Березный.

На україньскім боці зреконштруує ся драга H13 в довжці 1,8 км, котра веде з Ублі через Малый Березный, Дубриничі, Перечин аж до Ужгорода. На тот проєкт было схваленых понад 1,24 міліона евр із средств ENI. З того веце як 806 тісяч буде схоснованых на реконштрукції драг на словацькім боці граніці.

Карпатьска стежка звізд

Далшов успішнов орґанізаційов ПСК є Вігорлатьска звіздарня з проєктом Карпатьска стежка звізд. В співпраці з партнерами з Україны і Мадярьска ся з проєктом заміряють на проблему світлового смоґу. Проєкт хоче звекшыти знаня о проблемі світлового смоґу меджі публічныма і културныма інштітуціями, селами і містами ці штудентами.

Ґеоґрафічно є проєкт заміряный на три народны паркы і їх околіцю, на Словакії іде конкретно о Народный парк Полонины. На реалізацію Карпатьской стежкы звізд было выділеных понад 601 тісяч евр, з чого про Вігорлатьску звіздраню піде веце як 270 тісяч.

Проєкт і про біціґлістів

Третім успішным проєктом є Звекшованя доступности і мобілты в черезгранічнім реґіоні Словакія – Україна, де буде головным коордінатором проєкту Уряд ПСК. Проєкт є заміряный на дві трасы – Полонины trail і Ужаньскый trail, дві окремы біціґльовы трасы в сусідніх реґіонах.

ПСК в співпраці зо селами Уліч і Стащін, і Лісосельскогосподарьскым маєтком Уліч выбудують на словацькім боці часть планованого біціґльового округу в Полонинах – Полонины trail. Выбудованых буде 4,4 км біціґльовых стежок і пять елементів транспортной інфраштруктуры. На проєкт было схваленых веце як 1,03 міліоны, з чого про партнерів ПСК піде понад 728 тісяч.

Путь предків і сполочна дідовизна

В Пряшівскім краю были підпорены іщі далшы два проєкты. Єдным є проєкт села Ліптовска Теплічка з назвов Путь предків. В співпраці з Великым Березным і Словацько-мадярьсков білінґвалнов ґімназійов в Мадярьску хоче село вдяка проєкту споїти „страчены“ родины, котры міґровали на тій теріторії посередництвом їх потомків.

Успішным быв і проєкт Сполочна култура в минулости і днесь, де є головным партнером місто Великый Шаріш. Проєкт є заміряный на сполочну історічну дідовизну із селом Ракошино в Закрпатьскій области, котрой головнов особоностьов є Франтішек ІІ. Ракоцій.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА