ПСК вступив до Карпатьского еврореґіону

Як інформовало Одділіня комунікації Пряшівского самосправного краю (ПСК), край вступив до здружіня з назвов Карпатьскый еврореґіон.

Одтеперь є меджі 90-ма самосправами, котры актуално здружує черезгранічный проєкт, з того 15 є з теріторії ПСК. Членство уможнить краю брати участь на выміні тых найліпшых інформацій і скушеностей партнерів у імплементації черезгранічных проєктів, головно в области турістічного руху.

Пряшівска жупа має в близкій будучности за ціль зрядити і канцеларію Еврореґіону в Пряшові.

Вступ до здружіня схвалили посланці Заступительства ПСК на своїм юновім засіданю. Край од членства очекує і ефектівніше черьпаня еврофондів в рамках проґрамів Interreg Польща – Словакія і Interreg Next.

Карпатьскый еврореґіон выникнув у 1993-ім році підписом реґіоналных урядів пригранічных областей Польщі, Словакії, Мадярьска і Україны. Того часу є в нім 90 самосправ, з того 71 на уровни окресів, міст і сел. Із ПСК там суть і міста ці села з русиньскым населіньом як Снина, Стропків, Бардейов, Меджілабірці, Нижня Ядлова, Нижня Полянка ці Стащін.

Од юна того року став членом черезгранічного субєкту, котрый має свій центер в польскім Ряшові, і ПСК. За членьскый поплаток, котрый про вшыткых членів представлює єдну десятьтісячіну розрахунку жадателя, зрядить ся і буде фунґовати в змыслі договору канцеларія Еврореґіону в Пряшові.

Політіка Карпатьского еврореґіону є до 2030-го року основана на стратеґії з назвов Карпатьскый горізонт 2030, причім його найважнішым проєктом, окрім творіня ефектівных штруктур співпраці, є творіня карпатьской значкы Carpathia, i основаня обсерваторії турістікы в Карпатах.

З Карпатьскым еврореґіоном повязане є і творіня черезгранічных фунґуючіх областей, в рамках котрых буде мож фінанцовати проєкты посередництвом такзваных черезгранічных теріторіалных інвестіцій. Приготовлять ся такзваны продуктовы пакликы даного реґіону, вдяка чому напрямить ся турістічных рух за повно комерчных выужытьом.

Здружіня, котрого ПСК став членом, повнить функцію коордінатора Карпатьской платформы тырвало утримательного розвитку турістічного руху, і представлює важный політічный мандат про різны меджінародны актівности на теріторії Карпат.