Радвань над Лабірцьом має з причіны сухот проблему з водов

Актуалне сухе літо, як і дакілько попередніх, примусило жытелів русиньского села Радвань над Лабірцьом, Меджілабірьского окресу, проглубльовати студні.

Як про аґентуру TASR повіла старостка села Яна Свічінова, при єднакім стані клімату то в слідуючіх роках не буде мусити быти рішіньом. „Мы досправды в сітуації, же в нас є вода понад золото, сітуація з рока на рік є гірша. Досправды не знам, што буде далше, люди боять ся о воду,“ повіла старостка.

В Радвани на Лабірцьом не є публічного водоводу, жытелі суть одказаны на властны студні. Намагы выбудовати сельскый водовод мав уж попередній староста. Но їднаня з Выходословацьков водарьсков компанійов скінчіли лем коло проєкту на зачатя процесу, пак з капацітных і фінанчных причін водарні од того одступили.

Водовод моментално кінчіть в Грабовці на Лабірцьом, котрый є десять кілометрів од Радвани. Подібну проблему мають подля Сівчіновой і в недалекім Берестові на Лабірцьом.

Містны жытелі суть за словами старосткы звыкнены куповати собі паковану воду, на поливаня загород хоснують доджову воду і воду з рікы Лаборець.

„Но і тот нам вже тече лем як потічок,“ говорить старостка, котра кликала із Справов поводя Лабірця, жебы в селі зробили порогы на затримованя воды. Пак за їй словами і уровень воды в студнях бы тримала ся на даякій высоті. Єдночасно конштатує, же таке рішіня якбач буде проблема з рыбарями і охранарями.

Маленькым позітівом має быти факт, же містна школа є почас літа заперта. Но покля бы сухе літо мало продовжовати і далше, в осени то подля Свічіновой може быти в селі „катастрофа“.

Фото: Pixabay.com.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА