Разом можеме творити «Річник Руской Бурсы»

«Річник Руской Бурсы» то выданя ґорлицкой Руской Бурсы, якє єст науковым лемківскым часописом. Як інформує головна редакторка часопису др габ. Олена Дуць-Файфер, рыхтуваный єст 17. том публикациі на 2021 р.

Головном темом того чысла будут «Просторовы аспекты в лемківскым/русиньскым дискурсі». Уж тепер можете спілтворити Річник, кєд лем задумате написати тексты, якы будут односити ся до темы і будут опрацуваны подля редакцийных принципів выданя.

Простір. А што то такє?

Выданя «Річника Руской Бурсы» на 2021 р. буде зас моноґрафічне, тым разом сконцентруване довкола темы простору як єдной з основных культуровых катеґорий стисло повязаных з етнічном достеменністю і ріжныма взорями орієнтациі, якы сут соспільні творены через дану спільноту.

«Уж в самым названю Карпатскых Русинів містит ся безпосереднє просторове однесіня до конкретной териториі, яка остала міцно усимволичнена в етнічным/культуровым дискурсі», пише в інформацийній ноті др габ. Дуць-Файфер.

Редакция «Річника Руской Бурсы» звертат ся до вшыткых заінтересуваных, жебы брали участ в творіню выданя і надсылали своі тексты. Тему мож представити напр. в обшыри лінґвістичных конструкций, односячых ся хоц бы до языкового образу світа, знакуваня просторовых реляций і параметрів, выражаючых розумову і емоцийну перцепцию простору, оддзеркаленых в лексиці, всякого рода топонімів.

Просторовы катеґориці сут очывидно глубоко пристуны і на ґрунті красной літературы.

Як дальше в запрошыню до спілпрацы анонсує головна редактора – «дискурсивне значыня простору осаджене єст в його соспільным конструуваню, орґанізуваню, заґаздовуваню, знакуваню. Осадництво, архітектура, будівництво, формы просторовых конструкций в реляциі до природы і натурального уформуваня терену то основна обшыр досліджаня просторовых катеґорий».

Простір мож односити тіж до часу (хронотопу), якій єст основом памяти і історичого контінуум. Однесіня до етнічного, культурового простору єст бо фундаментом історичных нарраций. Но, окрем того глубокє усимволичніня просторовых катеґорий в етнічным дискурсі, розумліня і выражаня достоменности, самоідентицікациі тыма катеґориями, але тіж палімсестніст, пограничніст, гыбридизация ци вельокультуровіст то обшыри антрополоґічных, социйолоґічных, культуровых досліджынь.

Вкінци, просторовы катеґориі мож тіж анализувати в рамках реліґійознавчых, філософічных, музиколоґічных і інчых досліджынь з обшыри гуманістикы, бо такы сут головні в обсягу публикацийного заінтересуваня «Річника Руской Бурсы».

Вартат писати

Желаньом редакциі «Річника Руской Бурсы» є, жебы ґу творіню тогорічного выданя долучыли вшыткы, якы хотят написати своі тексты. Тексты мусят сполянти формальны вымаганя, якы заінтересуваны можут отримати, пишучы під вказаный долов майльовый адрес, як тіж звертаючы ся до редкациі нашого порталю.

Як додає др габ. Дуць-Файфер, редакция часопису сподіват ся, же так шыроко і інтердисциплінарні вызначена тема принесе інтересуючый публикацийный ефект не лем пошырюючый знаня в лемкознавчій обшыри, але тіж заінспірує до дальшых досліджынь і дискусий на повязаны темы. Очывидно окрем спомянутых горі форм дозволены сут ґеоґрафічны ци природничы тексты, якы односити ся до будут до лемківского, русиньского простору.

Просиме зголошати свою участ, подаючы тему статі і короткій єй плянуваный зміст, до 15. мая 2021 р. Готовы статі в лемківскым/русиньскым, польскым або анґлицкым языку, опрацуваны подля редакцийных принципів «Річника Руской Бурсы», просиме присылати на адрес rocznik.ruskiej.bursy@wp.pl до 31. серпня/авґуста 2021 р. Всякы звіданя так само мож подавати на реченый адрес.