Голосник

Реґіон Снины має затрактівнити Полониньска турістічна траса

Сполочны наміры з Пряшівскым самосправным крайом при розвитку турістічного руху декларовало у четверь 16-го януара 2020-го року 18 партіціпуючіх субєктів, представителів містных заінтересованых ґруп і самосправ.

Было то при нагоді підпису меморандума о взаємній співпраці, котрый партіціпуючі підписали в просторах Уряду Пряшівского самосправного краю. Документом сіґнатарі з окресу Снина выразили інтерес взаємно партіціповати при досягованю сполочных цілів, підпорі економічного і соціалного розвитку окресу Снина і головно области Народного парку Полонины.

Полониньска турістічна траса

Сіґнатарями меморандума суть Пряшівскый самосправный край, Лісогосподарьскый маєток Уліч, Державна охорона природы Словацькой републікы, Місто Снина, Лісоохранарьске здружіня VLK, Областна орґанізація турістічного руху Вышній Земплін і Вышній Шаріш і села Березовець, Кална Розтока, Кленова, Колбасів, Прислоп, Рунина, Руська Волова, Руськый Потік, Стащін, Стащіньска Розтока, Тополя, Уліч і Уліч-Криве.

Підписом ся декларовала приготовленость на реалізацію думкы вытовріня такзваной Poloniny trail – Полониньской турістічной трасы, котра бы мала стімуловати розвиток турістічного руху в тім русиньскім реґіоні. Траса бы мала зліпшыти мобіліту, доступность сел.

Намір бы мав быти фінанцованый з еврофондів, у першій фазі в рамках черезгранічного проґраму ENI CBC Мадярьско-Словакія-Румунія-Україна 2014 – 2020 і в припаді успішности бы мав быти реалізованый вже од авґуста того року. Выбудованя Poloniny trail притім корешпондує з цілями Пряшівского самосправного краю і ініціатівы „добігаючіх реґіонів“ – Catching-up Regions, котра є реалізована в співпраці з Европсков комісійов і Світовов банков.

Пілотный проєкт

Меджінародны експерты окрес Снина і область Народного парку Полонины зарадили меджі пілотны реґіоны про наштартованя розвитку і піднятя выконности. Як повів пряшівскый жупан Мілан Маєрьскый, потреба помочі про окрес Снина є о тілько векша, же його віталіту і діспонібілность ослаблюють неґатівны демоґрафічны тренды. То ся подля жупана вказує і на недостаточній інфраштруктурній выбавлености, де піде і помоч од края.

Пріматорка Снины Даніела Ґаландова повіла, же суть рады за тоту ініціатіву. Місто подля ньой уж має выбудовану властну інфраштруктуру, але Снина ся замірять на компоненты односно културной дідовизны як і на довыбевленость, што до турістічной інфраштруктуры.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі