Реконштрукція гуменьского каштеля бы ся мала закінчіти тот рік

Цільом веджіня Вігорлатьского музея в Гуменнім є закінчіти третю етапу реконштрукції його головной будовы – ренесанчного каштеля, почас того року.

Як про аґентуру TASR повів директор інштітуції Василь Федіч, ставебны роботы в рамках другой етапы, котра є повязана з третьов, закінчіли на кінцю 2020-го року. І наперек реконштрукчным роботам а панедемії нового коронавірусу Вігорлатьскый музей в Гуменнім оцінив минулорічну літню сезону як єдну з найуспішнішых.

Перша етапа іщі в році 2016

„Ставебно-рештавраторьскы роботы на дворі гуменьского каштеля суть продовжіньом реконштруцкії історічного обєкту, котрой перша етапа была закінчена у 2016-ім році,“ повів директор музея з тым, же попередній план реалізовати реконштруцкію музея в двох етапах змінив зряджователь, котрым є Пряшівскый самосправный край.

Друга етапа была наконець розділена на дві части. Средства в сумі майже 650 тісяч евр на реконштрукцію Вігорлатьскый музей здобыв, як єдиный музей на Словакії, з проґраму Обнов собі свій дім, дотаційов в сумі 300 тісяч евр поміг і Пряшівскый самосправный край.

В другій етапі, котра проходила од апріля 2019-го року до децембра 2020-го року, зробила ся комплетна реконштруцкія внутрішньой фасады каштеля. В третій етапі, з котров зачали уж почас той другой, робить ся передовшыткым управа двора ренесанчного будинку.

Літня сезона успішна

Як інформовав аґентуру Федіч, велика історічна переміна каштеля почас реконштрукчных робот так само стабілно притігала домашніх навщівників, але і тых мімо реґіону з інтересом о реґіоналну історію.

„Сьме їм за то вдячны, же з охотов толеровали многы безпечностны обмеджіня, котры сьме вырішыли зробити за ціну сприступніня прекрасных експозіцій каштеля нашым навщівникам,“ сконштатовав.

Вігорлатьскый музей вєдно з великов реконштрукційов почас попередньой сезоны реалізовав і музейну а освітню діялность. Наперек технічным обмеджіням і непрязній епідеміолоґічній сітуації оцінив директор літню турістічну сезону в місяцях юл і авґуст за єдну з найуспішнішых, музей навщівило майже 12 800 навщівників.

„Кількость навщівників почас того періоду была векша як навщівность в попереднім році о майже тісяч,“ доповнив Федіч з тым, же почас цілого 2020-го року навщівило Вігорлатьскый музей понад 17 тісяч людей.

Гуменьскый каштель і музей

Каштель в Гуменнім є народнов културнов памятков. Будова є домінантов міста. Збудованый быв на місці середньовікого водного замку. Форму яку має днесь здобыв аж на зачатку 17-го столітя. Замок належав довгый час роду Друґетів. Ку найвекшым перебудованям обєкту дішло в другій половині 18-го столітя. Як головна будова музея служыть од 1960-го року.

Музей має много артефактів з русиньского реґіону вышнього Земпліна. В сканзені, котрый належыть під Вігорлатьскый музей, мож видіти деревяны будовы з русиньскых сел. Од 1989-го року має музей Ґалерійну сінь Ореста Дубая – єдного із найвызначнішых русиньскых вытварників на теріторії днешньой Словакії. Музей часто презентує і русиньску културу різныма формами – выставками, културныма проґрамами ці выдаваньом публікацій.

Жрідло фотоґрафії: Vihorlatské múzeum v Humennom.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА