Резолуція Общества приятелів Підкарпатьской Руси ку юбілею анексії

Общество приятелів Підкарпатьской Руси (Společnost přátel Podkarpatské Rusi) є обчаньскым здружіньом, котре было засноване у 1990 році і дійствує в Чеській републіці. Окрім іншого є і членьсков орґанізаційов Світового конґреса Русинів за Чехію. Ідейово одкликує ся на діятельность Клубу приятелів Підкарпатьской Руси, котрый быв заснованый в міджівойновім періоді в Братіславі.

Цілями общества суть проглубованя односин зо жытелями і орґанізаціями Закарпатьской области Україны, бывшой Підкарпатьской Руси, підпора Русинів на теріторії Чехії ці популарізація Русинів в Чеській Републіці. Общество выдавать і часопис „Podkarpatská Rus“, но і далшы неперіодічны публікації.

В рамках 70-го юбілею анексії Підкарпатьской Руси Совітьскым союзом Вална громада общества, як інформує орґанізація на своїм сайті, прияла слідуючу резолуцію:

1. Вална громада Общества приятелів Підкарпатьской Руси припоминать 70-тый юбілей русиньского Мюнхену – одступліня Підкарпатьской Руси, котра была до 1945 р. частьов Чехословакії, Совітьскому союзу. Тот чін ся став в протиречіню ку споєнецькому договору міджі Чехословакійов і Совітьскым союзом і без демократічного выражіня векшыны жытелів.
2. Русины, автентічный народ Підкарпатьской Руси, і їх ідентічность, култура, історія і вызначны особности были і суть даваны до забытя за помочі намагы новых властей.
3. Без навернутя ідентічности і історії, як і без підпоры културных традіцій і господарьского піднятя Русинів на Підкарпатьскій Руси, не подарить ся оддалити свідомость історічной кривды Русинів, ани оддалити їх недовіру ку сучасному веджіню державы.

Резолуцію общество подля інформацій на сайті прияло 23-го мая 2015 р.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА