Резорт школства хоче дефіновати термін народностне школство

Міністерство школства, наукы, досліджіня і шпорту Словацькой републікы хоче дефіновати термін народностне школство. В розговорі про аґентуру TASR то повіла державна секретарька резорту школства про народностну і інклузівну освіту Моніка Філіпова.

Державна секретарька твердить, же на тім вже роблять. „Наперед нашым планом было, жебы сьме зробили окремый закон про народностне школство, але з оглядом на єднотнішу леґіслатіву роздумуєме над закомпонованьом окремой части до школьского закона, де ся задефінує народностне школство,“ повіла Філіпова.

Візійов є посилнити народностне школство

Резорт школства бы приготовлювану зміну хотів досягнути до кінця календарьного року. „Не іде о засягованя до школьской сістемы, іде о єднозначну дефініцію, што значіть народностне школство на Словакії, і в якых шпеціфіках є інше од словацькых школ, наприклад коли бісідуєме о школі з навчалным языком народностной меншыны,“ пояснила державна секретарька.

На Словакії є коло 700 інштітуцій, де ся учіть в мадярьском языку. Дві школы суть з русиньскым навчалным языком, на пару далшых є навчаня русиньского языка. Існують і україньскы, німецькы ці ромскы школы.

Народностне школство подля Філіповой забезпечує освіту дітей в материньскім языку. „Найвекша кількость народностной меншыны є мадярьска, причім на Словакії маєме стабілну сіть матерьскых, основных і середніх школ, де ся мадярьскый язык учіть,“ інформовала Філіпова з тым, же візійов резорту школства є посилнити народностны школы.

Народностна школа не є гендікеп

Філіпова з властной скушености твердить, же діти, котры ходили до матерьской школы, де ся учіть мадярьскый язык, наслідно перейдуть на такый тіп школы і на основну а середню школу.

„Векшый шок може быти, кедь школярь вырішыть іти на словацьку высоку школу. В тім припаді може быти недостатком якраз уровень знаня словацького языка, і ту хочеме помочі. Жебы діти, котры ходять до сістемы народностных школ, не думали собі, же є то про них гендікеп, кедь хотять іти на словацьку высоку школу, але наопак, обогатить їх то,“ додала державна секретарька.

Новела школьского закона подля Філіповой буде занимати ся нелем дефініційов народностного школства, але і выховов а освітов членів народностных меншын.

Жрідло фотоґрафії: ОЗ Колысочка.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА