Через crowdfunding – здобываня грошей од підпорьователів проєкту, рихтує ся выданя 200-сторінковой русиньской кухарьской книжкы, котра буде мати тексты в словацькім, русиньскім і анґліцькім языку.
Татарчаны пирогы, мачанка ці голубкы
Як пишуть авторы книжкы, котра буде мати назву Мамина русиньска кухня, не хотять, жебы таємніці русиньской кухні, якыма суть татарчаны пирогы, мачанка ці голубкы, запали порохом. В книжці, котра бы мала выйти в новембрі 2018-го року, буде довєдна 52 рецептів.
Авторами книжкы суть Олі Джупінкова, котра є модераторков новин в наслуханішім радію на Словакії – радію Expres, їй мама Олґа Джупінкова, котра дала до книжкы свої овірены рецепты, якы і сама приготовила на фотоґрафованя і Петер Штухар, котрый постарав ся о дізайн книжкы.
Лем традічне варіня на цілый рік
Авторы на сайті проєкту пишуть, же на приготовліня рецептів были схоснованы лем такы потравины, котры были в минулости все в обыстю, котрых ся люди доробили на своїх полях, загородах ці в лісах. Іде наприклад о бандуркы, квасну капусту, фасолю, грибы, часнок ці оріхы.
Книжка є розділена на пять частей. Першов суть стравы на Рождество, в другій части найдете рецепты на Великдень. Третя часть має назву Літо на валалі і найдете там рецепты на печены пирогы, бухты, стравы котры носили ся на поле наприклад на сінокос. Капітола Осінь є о рецептах з квасной капусты, грибів, но найти там мож і прославлены голубкы. Бандуркы в книжці дістали окрему часть, там чітатель найде рецепты на такы їдла як локшы, налісникы ці на ґуґель.
Луксусна книжа выйде лем з дарів
Книжка Мамина русиньска кухня є пріватный проєкт, котрый є робленый без будьякой фінанчной дотації. І зато авторы зберають на сайті startlab.sk грошы на выданя.
Каждый собі може выбрати єдну із можливостей підпоры – подля сумы, котру хоче даровати, і зато дістане будь книжку по їй выданю, книжку з подарунком, припадно може зажыти русиньскый вечур, де буде коштовати рецепты з книжкы. Так само може даровати і низшы сумы, покля не хоче за одміну подарунок од авторів, лем помочі выданю публікації.
Книжка буде мати досправды луксусный дізайн. Повнофаребна публікація з фотоґрафіями буде ручно шыта і окладка буде з білого полотна із сліпоражіньом. Хто бы мав інтерес о проєкт, може го найти за тым мотузком.
Жрідло фотоґрафій: startlab.sk
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі