Різдвяна «Бесіда» з календарьом на Новый 2023 Рік

Кінцьом рока до нашых рук трафлят остатній тогорічный номер часопису Стоваришыня Лемків – «Бесіда», ч. 6 (189) за місяці листопад/груден 2022 р. Тото святочно-новорічне чысло приносит нам традицийно «Календар Бесіды на 2023 рік», якій радо вішаме в нашых хыжах.

Нинішнє выданя одкрыват нам радістна віст про тото, што на чужыні в істо польскій ґазеті являт ся част посвячена выключно лемківскым справам, в якій тексты сут по лемківскы. То нова справа – кєд же до той поры явили ся три номеры вкладкы «Лемківскій Голос», яка долучена є до ґазеты «Głos Regionu Chocianów». Проєкт при спілпрацы з о. Богданом Репелом на тот момент реализує Севериян Косовскій. Детальнійше розпишеме ся на тоту тему в окремій статі (уж о пару дни).

Окрем того в посліднім выданю прочытаме м.ін. статі:

• Петро Медвідь, Мадярска столиця была центром русиністикы. Русины засідали в парляменті;
• Севериян Косовскій, Ведеме кампаніі. Хочеме, жебы інчы нас познали;
• Наталия Малецка-Новак, ХХХ Лемківска Творча Осін;
• Андрий Копча, Ґожівскы Стрічы проходили 28. раз… по двох роках;
• Петро Медвідь, Перемога літературы;
• Петро Трохановскій, Лемківскы Творчы Осени;
• Петро Трохановскій, Йоан Брадач (до 250. річници смерти);
• Петро Трохановскій, Нестор Репела (до 20. річници смерти).

Незмінно в «Бесіді» в части «Новины, не новины – не лем з Лемковины» найдете тіж спис подій за остатні два місяці. Почытаме і выімкы з інчых ґазет – польско- і словацкоязычных дописів.

В зимовы, святочны вечеры будете мочы прикрасити душу і лемківском поезийом (в тым в тлумачыню на італияньскій язык) – в часописі як раз явило ся пару вершів Петра Мурянкы, Володислава Грабана, Олены Дуць-Файфер, Павла Стефановского і Стефаніі Трохановской. Мож почытати і выімкы з оповіданя Нестора Репелы «Новый Рік» та фраґмент опрацуваня Богдана Ґамбаля на тему різдвяных свят на Лемковині, якій был публикуваный в книжці «Колядкы / коляды Русинів/Руснацох/Лемків» ( Свидник 2014).

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 9.00-15.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі на сайті www.stowarzyszenielemkow.pl.