Різдвяний Гокус Покус (нажыво) – неділя, 20.00 год.

Днешній проґрам єст посліднім в 2015 році. Што буде о рік – тяжко днес речы. Зато уж тепер зачынаме тему Різдва Христового з языкового боку. Єдны свята – за григорияньскым календарьом – уж за нами. Тринадцет днів ріжниці єст в юлияньскым календарі і – што можеме пердвидіти – уж неодолга Русины, котры святкуют за старым стильом, тіж привитают праздник Рождества.

Кєд іщы сте не звідали, чом така тема в Языковым Гокусі Покусі, спішыме пояснити, одкале маме тілько языковых форм в русиньскым языку, котры тыкают ся праздників, святкуваных в обох календарях 25.-27. грудня/децембра. А єст іх вельо: Рождество, Різдво, Ріство, Риство. Може, кєд текучий час буде прихыльний, дійдеме і до слова Крачун. Слухайте лем.фм!

Языковий Гокус Покус – радийовий проґрам про лемківскій язык во вшыткых його аспектах і просторах. Премєра в неділю 27. грудня/децембра 2015 р. о 20.00 год., повторіня о ден о 2.00, 8.00 і 14.00 год. за лемківскым часом. Лем в радию лем.фм!