Голосник

Різдвяны желаня од президентів Польщы і Словациі

Традицийно з нагоды Різдвяных Свят, якы проходят за юлияньскым календарьом, Президент Польской Республикы Анджей Дуда вєдно з Першом Дамом Аґатом Корнгаузер-Дуда передали святочны желаня вірным вшыткых східніх Церкви. Вінчуваня зложыла так само президентка Словацкой Республикы, Зузана Чапутова, яка тот рік звернула ся прямо i по русиньскы.

Польска президентска пара желат предовшыткым оптимізму і надіі. «Віриме, што дальшы Рождественны Свята будут уж вільны од страплінь і трудів звязаных з пандемійом коронавіруса, а через тото будут іщы веце торжественны і радістны», пише ся в офіцияльным комунікаті на сайті www.prezydent.pl.

Президентка Словациі того рока вінчує вшыткым святкуючым за старым стильом в языках поєдных нацийональных меншын. «Милы спілгромадянкы, милы спілгромадяне, вшыткым з вас, котры днес славите Рождество подля юлияньского календаря, желам свят в полным здоровлю, любови і мирі», бесідує Чапутова. Дальше в короткым фільмі поздоравлят і Русинів словами: «Веселы Рождественны Свята!». Президентка переповіла тіж po украіньскы, росийскы, болгарскы і сербскы.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі