Рондо Новосільского в Білым Борі

Од пятниці, 31. марця 2017 р., єдно з ронд, находячых ся в Білым Борі (західньопоморскє воєвідство), носит мено Юрия Новосільского – єдного з найвызначнійшых лемківскых атристів-іконописців, філософів та теолоґів. Такє рішыня схвалила Рада Міста Білий Бір, а причынком ґу тому є закон про загальнопольску декомунізацию назв, котры пропаґуют або упамятянют тоталітарны режімы.

Рондо Новосільского іщы є лем на папери. Новы табличкы, інформуючы о наданій назві, будут поставлены по 14 днях од заявы рішыня Рады Міста Білий Бір в Деннику Урядовым Західньопоморского Воєвідства. Окрем ронда, в місті змінены будут назвы другых улиц. Дотеперішня ул. Жытомєрского буде носила мено Слупской, а улицю Червеной Арміі змінено на Члуховску.

Соспільны консультациі в тій обшыри зачали ся 5. грудня/децембра 2016 р. і тырвали до лютого/фебруара т.р. Як повіл локальным медиям заступник бургомайстра Білого Бору – Ян Батрух, введены зміны то своєрідний компроміс. Перед консультациями были пропозициі, жебы ул. Жытомєрского замінити на ул. Новосільского, але фінальне рішыня остало при ронді названым меном Ю. Новосільского. Присутніст лемківского артисты і філософа в тым місті є значуча, прото же в Білым Борі находит ся побудувана в роках 1992-97 грекокатолицка церков Рождества Пресвятой Богородиці, котрой спілавтором проєкту являт ся сам Новосільскій, де предовшыткым і розпис, і іконостас, тіж вышли спід його ґеніяльной рукы.

Новосільскій все зазначал своє лемківскє коріня. Цінил сой Русинів і одкрыто голосил, же хоц сотками років жыли они сусідуючы з західніма народами, то нияк не стратили своіх східніх прикмет. Повідал, же через тото не боіт ся асиміляциі Лемків. Одышол 21. лютого/фебруара 2011 рока в Кракові, де є похований на Раковицкым Цмонтери.

О соспільных консультациях і особі Новосільского писали сме шырше в статі пн. Улиця Новосільского в Білым Борі?