Архієпіскоп метрополіта гайдудорозькый Філіп Кочіш 16-го октобра 2020-го року в рамках вечурні поблагословив основный камінь деревяной церькви в Дебрецині – части Йовжа , котра буде стояти коло русиньского дому – Русиньского ґрекокатолицького центру, якый быв святочно одкрытый в місяці апріль 2019-го року.
На події брали участь Віктор Крамаренко – председа Вседержавного русиньского самосправованя в Мадярьску, заступник старосты міста Акош Балаж ці містный парох Чаба Сентешій. Інформацію принесли мадярьскы порталы.
Церьков буде і одказом на предків
Нова церьков про Русинів в Мадярьску є потребов, кедьже росне кількость русиньскых родин, кторы практікують свою віру. Єдночасно є лоґічным кроком, кедьже в минувшім році быв одкрытый і комунітный центер. Храм дотримать восточну традіцію і буде орьєнтованый на выход.
Як у приговорі повів метрополіта Філіп, то же церьков буде збудована з дерева, припоминать і бідных русиньскых предків, котры не мали нич інше, і так будовали храмы з дерева, котре было в лісі. Церьков з природного матеріалну днесь несе і окреме посолство і має унікатну атмосферу. Храм зо жывой матерії буде подля метрополіты выжаровати красу Бога іншакым способом.
Нова русиньска церьков буде присвячена Благовіщенію Пресвятой Богородіці. Подля пароха Чабы Сентешія быв тот праздник выбратый зато, жебы ся на тім місці людям передавала радость з Пречістой Дівы, радость з Бога.
Путницькый центер про Русинів Карпатьской котловины
Як повів представитель містной самосправы Акош Балаж, фундуш, на котрім уж днесь стоїть путницькый центер і будє там і церьков, місто даровало ґрекокатоликам у 2009-ім році. Вірить, же комунітный дім і церьков з того місця вытворять іконічный центер.
За словами председы Вседержавного русиньского самосправованя Віктора Крамаренка є Дебрецин – Йовжа про Русинів в Мадярьску централным пунктом. Деревяна церьков подля нього зробить з того місця путницькый центер про русиньскых ґрекокатоликів із цілой Карпатськой котловины.
Містна русинська самосправа дала на будованя храму 50 міліонів форінтів, што є понад 137 тісяч евр. Гайдудорозька архієпархія буде платити решту вытрат. Цілково ся рахує зо сумов коло 110 міліонів форінтів, значіть коло 302 тісяч евр. Храм бы мав быти докінченый в осени слідуючого року. Наперед го поскладають в Семигородю, пак розоберуть, по частях перенесуть до Дебрецина, де го уж поставлять на своє місце.
Місце на стрічі вже стоїть
Як вже было спомянуто, Русины в Мадярьску вже мають свій комунітный центер, котрый быв посвяченый в минувшім році і є так само деревяный. Будованя того дому фінанцовала мадярьска влада. На передній стороні дому є русиньскый ерб і крест, котры поблагословив Папа римскый Франціск почас авдієнції мадярьскых Русинів у Папы в марці 2019-го року.
В Мадярьску ся в остатнім переписі населіня приголосило 3882 людей ку русиньскій народности, з того 1777 ку Ґрекокатолицькій церькви.
Жрідло фотоґрафій: Гайдудорозька архієпархія.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі