Русиньска фана на ратушы в Клівленд з нагоды Дня Русина

В четвер, 26. жолтня/октобра т.р., в американьскым Клівленд пройдут цілодньовы святкуваня повязаны з Дньом Русина в Пілнічній Америці. Головном точком проґраму буде вывішыня русиньской фаны на місцевым ратушы в Клівленд (Cleveland City Hall – Rotunda, 601 Lakeside Avenue E).  

Русиньска фана того дня буде вывішена з нагоды нацийонального святя Русинів Америкы. Ден 26. жолтня/октобра был офіцияльно выголошений Карпаторусиньскым Консорциюм Пілнічной Америкы в 2010 році за Ден Русинів Пілнійной Америкы. Факт, што Русины в Клівленд достали того рока нагоду вывісыти свій нацийональний символ, є великым доцініньом цілого русиньского світа. 

Дальша част проґраму зачне ся о 17:30 год. В тым місци буде час на стрічу з американьскым сенатором з Огайо, Майкельом Скіндель, якій по матери має русиньскы коріня. Тематика стрічы буде односила ся до Русинів, але і шырше до темы нацийональных меншын. 

26. жолтня/октобра 1918 рока

В 2007 році Світовий Конґрес Русинів зреалізувалл ідею, жебы кажда з членьскых держав, в котрых прожывают Русины, вызначыла єден ден в році, котрий буде торжественно празднуваний як нацийональноэий ден. В каждій з держав, в якых прожывают Русины, обраны даты сут повязаны з історичныма подіями. Так є і в Пілнійчній Америці.

Осіню 1918 рока до Ню Йорку вєдно із представителями двадцетьох інчых державотворчых народів, пришла делеґация Русинів, штобы вытворити Середньоевропейску Демократичну Унію. 26. жолтня/октобра того же рока представникы в сумі двадцетьох єден народів стрітили ся в історичній Сали незалежности (Independence Hall) в Філядельфіі, недалеко місця, де была в 1776 році выголошена Американьска деклярация незалежности. В тым місци державотворчы народы выголосили і підписали Деклярацию спільных намірінь (Declaration of Common Aims). В наслідстві того, 28. жолтня/октобра офіцияльно выникла  Чехословацка Ресублика, ґу котрій приєднали ся Пряшівска і Підкарпатска Русь, без третьой части Карпатской Руси – Лемковины (детальнійше чытайте гев). 

Дата тота засвідчат, што Русины в новожытній істориі были активным субєктом медженародной політикы.