Русиньска єпархія у Фініксі з новым єпіскопом

20-го юла 2016-го року, на свято пророка Ілії за ґріґоріяньскым календарьом, в Катедралнім соборі св. Штефана у Фініксі в штаті Арізона буде проходити інтронізація нового єпархіялного єпіскопа русиньской (ruthenorum) Візантійской католицькой єпархії Покрову Пресвятой Богородіці во Фініксі.

Новым єпархом у Фінікці днесь офіціално стане ся преосвященый владыка Джон Пазак. Пазак у функції черять преосвященого владыку Джералда Н. Діна, котрый пожадав о емерітуру на основі свого віку і вів єпархію од 2008-го року. Новый єпіскоп у Фінікці быв выменованый папом римскым Франциском 7-го мая 2016-го року. Єпіскопом є од 2001-го року і дотеперь служыв єпархом словацькой ґрекокатолицькой Єпархії свв. Кіріла і Методія в Канаді. У своій бывшій єпархії буде у функції апостольского адміністратора sede vacante (необсадженый столець).

Преосвященый владыка Джон Пазак ся народив в Ґері в штаті Індіана 13-го авґуста 1946-го року як найстарша дітина Йоганы і Штефана Пазаковых. Його предкове із вітцьового боку походили зо Земпліна. Середню школу закінчів у 1964-ім році і наступив до новіціату Редемпторістів (Конґреґація найсвятішого Выкупителя) в Десоті в штаті Мізурі. Богословіє закінчів на Універзіті св. Павла в канадьскій Отаві. За священика быв рукоположеный у 1972-ім році. Служыв парохом на многых парафіях в Споєных штатах Америкы і в Канаді. За єпіскопа быв выменованый папом Йоаном Павлом ІІ. 4-го децембра в році 2000. Став ся втогды в історії другым єпархом словацькой Єпархії свв. Кіріла і Методія в Канаді. Рукоположеный на єпіскопа быв 14-го фебруара 2001-го року.

Русиньска Єпархія Покрову Пресвятой Богородіці належыть під русиньску Візантійску католицьку метрополітну церьков з центром в Пітсбурґу. Є наймолодшов єпархійов той метрополії. Была заснована 9-го марца 1982-го року. Їй першый центер быв у Ван Нуйс. До Фініксу уряд єпархії переніс ся у 1994-ім році. У фебруарі 2010-го року папа римскй Венедікт XVI. офіціално переменовав єпархію подля центру єпархії. Новый владыка має у своїй єпархії 2 254 віруючіх, 19 парафій, 27 священиків, 8 діаконів, 4-ох монахів і 5 монахынь.

Жрідло фотоґрафії: www.holyspiritseminary.org

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА