Русиньска єпархія в Пармі має нового апостольского адміністратора

За інформаціями Пресовой канцеларії Конференції єпіскопів Словакії (Tlačová agentúra Konferencie biskupov Slovenska) быв в суботу, 24-го юнія 2017-го року, выменованый папом римьскым Франциском преосвященый владыка Мілан Лах, ТІ за Апостольского адміністратора sede vacante русиньской єпархії Парма в Споєных Штатах Америкы.

Вість о выменованю владыкы Мілана за адміністратора была публікована в Osservatore Romano днесь о 12.00 год. римского часу при нагоді праздника Рождества святого Йоана Крестителя.

Іду ку Русинам. Історія ся повторять

Новый апостольскый адміністратор дав такой розговор Пресовій канцеларії Конференції єпіскопів Словакії. Описав єпархію, в котрій буде діяти і пояснив, же є то русиньска єпархія, котру творять векшынов люди, якых предкове ся до Америкы выселили за роботов перед веце як сто роками і были то головно Русины із Австро-Угорьской імперії.

„Церьковноправно є русиньска ґрекокатолицька церьков в США метрополітнов церьквов зо свойов Радов єрархів… Має штири єпархії – архієпархію в Пітсбурґу, на челі з головов той ґрекокатолицькой церькви, архієпіскопом і метрополітом владыком Віліамон Скурлом, єпархію Пасайк, близко Ню Йорку, на челі з владыком Куртом Бурнеттом, єпархію Фінікс, близко Сен Френціска, з владыком Джоном Пазаком і наконець єпархію Парма, близко Клівленду, де єм быв менованый я за Апостольского адміністратора sede vacante. Як єм вже повів высше, суть то головно потомкове нашых Русинів, але і Словаків, Мадярів ці Хорватів – ґрекокатоликів з бывшой Австро-Угорьской монархії,“ повів в розговорі владыка Мілан.

„Лем по інтересность, і мій дідо з маминого боку, Ян Завацькый, народив ся в Чікеґу, на теріторії теперішньой єпархії Парма і як штирирічный ся вернув зо своїма родічами і сродниками назад до Остурні за Австро-Угорьска, днесь в окресі Кежмарок. Значіть видите: історія ся повторять. Так як мій прадідо ішов за роботов до США перед веце як сто роками, так я там іду теперь, жебы єм з Божов помочов старав ся о тотых нашых віруючіх і быв їм отцьом,“ продовжовав далше владыка Мілан в розговорі.

Владыка Мілан Лах

Владыка Мілан Лах народив ся 18-го новембра 1973-го року в Кежмарку. Сам має русиньске походжіня – його родічі походжяють з Остурні. Богословскы штудія закінчів на Теолоґічній факулті Тырнавской універзіты в році 2001. На діакона быв высвященый владыком Міланом Хаутуром 11-го новембра  в році 2000 в Катедралнім соборі Рождества Пресвятой Богородіці в Кошыцях, і 1-го юлія 2001-го року там прияв од владыкы Хаутура і священьске рукуположіня.

В роках 2001 – 2003 быв у комуніті єзуітів в Кошыцях, де по року діяв і як науковый робітник в Центрі спірітуаліты Выход – Запад Михала Лацка. Од року 2003 до року 2004 быв повіреный веджіньом того центру, єдночасно выпомагав як священик в Кошыцях і околіці. В році 2004 зачав высшы штудія на Папскім восточнім інштітуті в Римі, де здобыв у 2006-ім році ліценціат з восточных церьковных наук і в році 2009 здобыв докторат в тій самій дісціпліні обгайобов дізертачной роботы Вклад Юрія Іоанікія Базиловіча ЧСВВ на монашеску формацію василіянів Мукачівской єпархії в роках 1789 – 1821. Владыка Мілан быв почас римскых штудій і выпомічным шпірітуалом Папской колеґії Руссікум і духовный асістент Федерації скавтів Европы в Римі. Авторьскы співпрацовав і з Ватіканьскым радіом.

По навернутю зо штудій в році 2009 робив як директор знова у Центрі спірітуаліты Выход – Запад Михала Лацка в Кошыцях. Єден семестер учів спірітуаліту хрістіаньского Востока на Теолоґічній факулті Католицькой універзіты в Кошыцях, де быв і членом редакчной рады теолоґічного часопису Verba Theologica. Од 1-го децембра 2011 є продеканом про загранічны односины і розвиток на Теолоґічній факулті Тырнавской універзіты в Братіславі, де вчіть хрістіаньску спірітуаліту і спірітуаліту хрістіаньского Востока.

В рамках єзуітів быв од 30-го децембра 2009-го року конзултором провінціала і од 1-го януара 2012-го року быв і делеґатом про формацію єзуітьскых схоластіків. Моментално ся приготовльовав абсолвованиом третьой пробації на святочны вічны обіты.

Владыка знать італійскый, анґліцькый і російскый языкы, пасівно знає і французькый язык.

За єпіскопа помічника Пряшівской ґрекокатолицькой єпархії владыка Мілан Лах быв менованый дня 19-го апріля 2013-го року папом римскым Франциском. За єпіскопа быв рукоположеный 1-го юнія 2013-го року в Лютині.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА