Ден 17. січня/януара признаный єст за нацийональне свято бачваньскых Русинів – Ден Русинів Сербіі. З той нагоды в найблизшу неділю пройдут празднуваня, якы з причыны продолжаючой ся пандеміі будут мати ограниченый вымір.
Участ в святкуванях буде можлива про вшыткых заінтересуваных через трансмісиі онляйн в інтернеті і в тамтышніх медиях. Ден Русинів Сербіі одбуде ся уж штырнадцетый раз.
На місци і віртуально
Тогорічны святкуваня Дня Русинів Сербіі з причыны пандеміі ограничат ся до мінімум. Подіі зачнут ся як раз о 18.00 год. благодарном Службом Божом, яка буде одслужена в грекокатолицкій церкви свв. апостолів Петра і Павла в Новым Саді.
О 19.00 год. одбуде ся культурный проґрам під назвом «Русины в Новым Саді і ретроспектива». Будут то споминовы акциі, вказуючы на попередні едициі свята. Так само о 20.00 год. в Радийо-телевізиі «Войводина» будут трансмітуваны проґрамы про новосадскых Русинів і скорочыня найліпшых выступів, якы дотля проходили в рамках Дня Русинів. При тым на третім проґрамі войводиньского радия буде вказана полна версия найліпшых выступлінь. Окрем телевізиі і радия, вшыткы тоты подіі будут трансмітуваны на порталях Facebook, YouTube i Instagram.
Орґанізатором святкувань єст русиньска інституция – Завод для культуры войводиньскых Русинів. Окрем того празднуваня проходят з підпором Нацийонального совіту Русинів, Проґраму для русиньского языка, та спомненых Радийо-телевізиі Войводины, парохіі в Новым Саді. Детальны інформациі вєдно з посыланями до трансмісий найдете за тым мотузком.
Ден Русинів Сербіі
Нацийональне свято Русинів Сербіі было призначене на ден 17. січня/януара. Дата тота была выбрана з той причыны, же як раз товды, в 1751 р., Мария Тереза дала декрет, же переселят Русинів з Карпат до полудньовых земель товдышньой Австриі. Так ся стало, прото од понад 250 років русиньска меншына заселят і територию днешньой Сербіі та Хорвациі.
Ден Русинів Сербіі першый раз был празднуваный в 2006 р., коли Автономічна Област Войводина выголосила 17. січня/януара за русиньскє нацийональне свято. За тым мотузком можете почытати архівне інтервю з Оленом Папуґом, членкыньом Нацийонального Совіту Русинів, яка розповіла про русиньскє свято в Сербіі.
Коментарі