Русины будуть святковати в Мішколці

Вседержавне русиньске самосправованя в Мадярьску і тот рік, як уж стало звыком, в місяці май орґанізує Русиньске націоналне свято, яке є все скапчане із передаваньом Премії імени Антонія Годинкы. Каждый рік тота подія проходить в іншім місті.

Тот рік орґанізаторы Русиньского націоналного свята выбрали собі про свою подію столицю Боршодьско-абовско-земпліньской жупы – місто Мішколц. Русины ся на торжество зыйдуть в суботу 9-го мая 2026-го року, і подія буде проходити в просторах Мішколцьской ґрекокатолицькой основной школы.

Тогорічным покровительом події є Віктор Крамаренко – нововыбраный представитель Русинів у Парламенті Мадярьска. Із святочным пригороом выступить і Лаура Дєнеі – заступник уповномоченого про права народностных меншын Мадярьска.

Русиньске націоналне свято почне молитвов Акафісту, котрый буде одправляти отець Ґейза Югас – ґенералный вікарій Мішколцьской ґрекокатолицькой єпархії.

В рамках културного проґраму будуть участны годны видіти выступліня дітей із недалекого русиньского села Мучонь, а так само і выступліня Мішколцьского русиньского танечного колектіву. В рамках проґраму, як уж было спомянуто, одбуде ся і передаваня Премії імени Антонія Годинкы од Вседержавного русиньского самосправованя.