Русины на конференції InterKult 2026

Як інформовала аґентура Рутенпрес, в суботу 10-го новембра 2026-го року одбыла ся в Новім Саді, в Мадярьскім културнім центрі імени Шандора Петефі, XII. меджінародна наукова конференція Інтеркултуралность в освіті – InterKult 2026.

Конференцію орґанізовали Педаґоґічный інштітут Войводины, одділіня про гунґаролоґію, румуністіку, русиністіку і словакістіку Філозофічной факулты Універзіты в Новім Саді, і Педаґоґічна факулта із мадярьскым навчалным языком в Суботиці.

Цільом конференції было представити резултаты актуалных перспектів і промованя інтеркултуралности, укріпіня академічной сіти домашніх і загранічных фаховців із різных дісціплін, котры хоснують концепты інтеркултуралности в освіті.

Конференція InterKult 2026 мала пленарне засіданя із выкладами, пак робота продовжовала в тематічных секціях.

В рамках єдной із секцій были представлены роботы із словакістікы а русиністікы, де были інтересныма презентації ку біоґрафії вызначной особности войводиньскых Русинів – Петра Кузмяка і його родины, котру мав Саша Сабадош і Дюра Мудри, пак реферат Александра Мудрого і Аніты Ґовля о концепті одпусту (кермешу) у Русинів із културолоґічного і лінґвістічного аспекту, як і аналіза інтеркултуралности у меджівойновій русиньскій ґазеті Руски новини на основі друкованых літературных творів переложеных із іншых языків, котру пририхтовала Ана Римар Симуновіч і Александра Деяновіч.

Головна тема конференції – Інтеркултуралность в освіті, мала на конференції підтемы: Інтеркултуралность і навчаня, Інтеркултуралность і язык, Інтеркултуралность і література, Інтеркултуралность і історія, Інтеркултуралность і товмчачіня, а Інтеркултуралность і вплив у медіях.

Фото: Рутенпрес.