Русины в Белеграді представили проєкт Білінґвалны STEM жены в науці

З нагоды святкованя Світового дня културной розмаїтости про діалоґ і розвиток Міністество про людьскы права, права меншын і соціалный діалоґ зорґанізовало 25-го мая 2021-го року в Палаці Сербія в Белеграді презентацію проєкту під назвов Білінґвалны STEM жены у науці.

Як інфомровала аґентура Рутенпрес, проєкт реалізовало Обчаньске здружіня руСТЕМ з Руського Керестура. Першорядо є заміряный на дівчата, членкы народностных меншыны, котры жыють в Сербії і мають близко ку наукам. Проєкт быв підпореный Міністерством освіты, наукы і технолоґічного розвитку.

Скорочіня STEM выходить із штирьох анґліцкых слов – наука, техонолоґіа, ініжінірьство і математіка (Science, Technology, Engineering and Mathematics), і хоснує ся на зґрупованя тых академічных дісціплін. Тот термін ся звычайно хоснує на рішіня політікы освіты або выберу навчалных основ на школах.

Даный STEM проґрам є напряменый на дівчата у віці од 14 до 18 років, котры суть з білінґвалных сел або міст, ходять до школ, котры суть з навчалным языком народностных меншын і мотівує їх, жебы ся заінтересовали споминаныма науками, і жебы по штудіях далше учіли тоты наукы.

Участных події привітала шефка резорту людьскых і меншыновых прав, міністерка Ґордана Чоміч. Як інформовала аґентура, міністерка повіла, же орґанізованя такой стрічі є способом, жебы держава, у котрій жены в науці здобыли освіту, вказала вдяку за вшытко, што зробили в области наукы, і жебы подяковала обчаньскым здружіньам, з котрыма довєдна брали участь в пропаґації білінґвалной STEM наукы, кедьже є то вызначным про вшыткых, котры прийдуть по них.

Наталія Будиньски, як єдна із коордінаторок проєкту, бісідовала о тім, же актівности споминаного проєкту пропаґують жены в науці із Сербії, з білінґвалного оточіня, котры окрем сербского бісідують і далшым языком, языком народностной меншыны, котры закінчіли середньошкольску освіту.

Проєкт є презентованый і в брожурі, де чітатель найде жены з наукы, котрых материньскый язык є русиньскый, мадярьскый, словацькый і босняцькый.

На стрічі брали участь науковці з Руського Керестура – Др. Ярослав Катона із Технолоґічной факулты з Нового Саду, директорка Середньой школы Петро Кузмяк Др. Наталія Будиньски, Др. Івана Будиньски із Інштітуту про біолоґічны баданя Сініша Станковіч в Белеграді, як і далшы білінґвалны жены в науцї.

На презентації проєкту были і державный секретарь Міністерства про людьскы права, права меншын і соціалный діалоґ Олена Папуґа, председа Націоналного совіту Русинів Борислав Сакач, председа Општины Кула Даміян Міланіч і далшы.

Жрідло фотоґрафії: Рутенпрес

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА