Русины в Сербії святкують свій день. Централны святкованя будуть через вікенд

17-ый януар в нашім календарі є записаный як День Русинів Сербії. Русины на нижній землі припоминають собі тот день як дату, коли у 1751-ім році радник Марії Терезії і адміністратор Кральовско-державного Бачского діштрікту в Зомборі – Франц Йозеф де Редл, підписав першый документ о насельованю 200 русиньскых ґрекокатолицькых родин до втогдышнього Великого Керестура.

Як є звыком, покля День Русинів выйде на день почас робочого тыждня, централны святкованя будуть проходити найблизшый вікенд, конкретно в неділю 21-го януара 2024-го року.

Сербскы Русины каждый рік орґанізують централны святкованя в іншім селі або місті, в котрім жыють, тот рік святкованя будуть в неділю проходити в Дюрдьові. В рамках проґраму централных святковань буде в неділю одкрыта выстава о історії жывота Русинів у Дюрдьові, а на восьму годину вечур є приготовлена святочна академія.

Уж почас Дня Русинів Сербії, 17-го януара, в Дюрдьові суть завішены русиньскы флаґы на будові містного уряду, школы і културного дому.

Но святкованя проходять традічно і в іншых містах а селах. 17-го януара будуть вечур проходити святкованя в Коцурі і Шыді, 19-го януара орґанізують ся святкованя в Новім Саді і Суботиці. Сримска Митровіця одсвяткує День Русинів Сербії 18-го януара. 19-го януара будуть святковати в Кулі, Руськім Керестурі, Бачінцях, Бікічу і Новім Орахові. Тогорічны святкованя закінчать ся 28-го януара у Вербасі.

Дата Дня Русинів Сербії была офіціално выбрата у 2007-ім році, а першы святкованя орґанізовали ся в януарі 2008-го року.