Руска матка проти дотацій з Україны

19-го юна 2021-го року засідала презідія орґанізації Руска матка, котра діє в Сербії і є членом Світового конґресу Русинів. Інформовала о тім аґентура Рутенпрес.

Презідія обговорила веце вопросів. Як про аґентуру повів Дяра Папуґа, председа орґанізації, сім присутных членів презідії вырішыло, жебы Руска матка урядно реаґовала на Націоналный совіт Русинів, русиньскый самосправный орґан, з причіны несхваленых фінанчных средств на проєкты, котры орґанізація подала, в першім ряді на друкованя свого офіціалного пресового орґану Руснак.

Руска матка буде реаґовати і на актівности Проєктового бюра Націоланого совіту, де є запропоноване гляданя фінанцованя з Україны як гражданам той державы в діаспорі, з чім Руска матка не є згодна.

На засіданю обоговорив ся і план роботы містной орґанізації в Коцурі, де была выбрана нова предсидателька Славица Чельковски. Якраз она презентовала на засіданю план, котрый по діскусії быв і схваленый.

Презідія орґанізації вырішыла, же буде далше глядати фінанції на друкованя часопису Руснак через спонзорінґ, як і через жадости на покраїньскы орґаны і локалны самосправы, де суть містны орґанізації Руской маткы.

На стрічі бісідовало ся і о далшых процесах коло друкованя книжкы Мала історія Русинів од Івана Попа, як і далшых справах о діялности орґанізації в наступных місяцях.

Жрідло фотоґрафії: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА