Руска Воля над Попрадом а лемківскій Лелюхів

17. червця/юнія 2018 р. в селі Руска Воля над Попрадом, якє находит ся на териториі Пряшівской Руси, проходили святкуваня 100. річниці основаня І Чехословацкой Республикы, сполочной державы Чехів, Словаків, Русинів. В рамках подій припоминана заєдно была 430. річнция основаня села Руска Воля, котре сусідує з лемківскым Лелюховом.

Цілодньовий проґрам зачал ся літургійом в грекокатолицкій церкви св. Михала Архангела, яка через вшыткы рокы служыла заєдно Русинам з Руской Волі, як і до кінця 40. років ХХ ст. Русинам з Лелюхова і дальшых місцевости (прим. Дубного), котры одвиджали своіх родаків в сусіднім селі. Дальша част подіі, орґанізуваной м.ін. Обществом молоды.Русины, проходила на футбольовым пляци в селі. Выступували русиньскы ансамблі і солисты.

До переселінь на Радяньску Украіну і пізнійшой акциі Вісла Лелюхів заселяли выключно Русины. Село одділене было од Руской Волі лем потоком, котрий на кєрі, при мості до Лелюхова вплыват до Попраду. Лелюховяне натурально ходили на кєрмешы до Руской Волі. В Лелюхові находит ся храм св. Димитрия, а в поблизкым Дубным церков св. Михала Архангела. Хоц Русинів по лемківскій страні уж неє, днешні осадникы заходят ся з Русинами з Руской Волі. Раз до рока є в Лелюхові орґанізуваний кєрмеш, в якым бере участ грекокатолицкій свещенник з Руской Волі вєдно зо своіма парохіянами.

Припоминаня 100. річниці І Чехословацкой Республикы як раз в тым місци є доказом на тото, што Чехословацка Республика близка была не лем Русинам з Пряшівщыны, але нарівно і Лемкам. В находячій ся 40 км од Лелюхова Фльоринці была орґанізувана Руска Народна Республика Лемків, діячы котрой роздумували як єден з плянів прилучыти лемківскы етнічны землі до Чехословациі. Памят про Русинів з Лелюхова є надале жыва серед старшого поколіня. В єдным з інтервю жытель недалекого Чырча, Михал Куба, розповідал о односинах Русинів з Пряшівщыны з Русинами з Лемковины. Про тоту част Лемковины  інтересуюче было облечыня. Селяне зберали ся так само як іх родакы з Руской Волі і Чырча.

Долов поміщаме фотореляцию старосты села Чырч, Михала Дідика, з подіі, на котрій были припоминаны не лем 100. річниця І Чехословацкой Республикы і 430. річниця основаня села, але заєдно памят про нерозлучніст з русиньскым Лелюховом.