До Rusyn Cup залучіло ся 35 команд із трьох держав. Фінале буде грати 16

2-го марца 2019-го року в містьскій шпортовій салі Mier в Бардейові одбуде ся фінале вже VI. річника фотбалового турнаю Rusyn Cup о путовный Русиньскый Погар. Турнай ся каждым роком тішыть векшому інтересу русиньскых шпортовців.

Од януара прохидили кваліфікачны турнаї в пятьох містах – в Братіславі (12. 1. 2019 р.), в Старій Любовні (12. 1. 2019 р.), у Свіднику (13. 1. 2019 р.), в Михалівцях (19. 1. 2019 р.) і в Руськім Керестурі, в Сербії (2. 2. 2019 р.). Цілково ся до змагань у кваліфікачных турнаях залучіло 35 русиньскых команд із трьох держав – Словакії, Сербії і Хорватії.

До фінале іде 16 команд

Як інформовав нашу редакцію Мартін Ямрошковіч, основатель і головный орґанізатор турнаю Rusyn Cup, до бардейовского фінале поступило 16 команд. З каждой кваліфікації іде грати до Бардейова троїця найліпшых, плус до фінале як переможця минувшого річника іде автоматічно команда ТЄ Дуява Хмельова, котра тот рік грала як гость на кваліфікації в Руськім Керестурі.

З братіславской кваліфікації пуступли Ferino Team (Снина/Братіслава), Свідник (Свідник/Братіслава) і Кооперація ФУ (Стара Любовня/Братіслава). Зо Старой Любовні ся до фінале дістали команды Аmater Club (Снина/Пряшів), Шамбріньці (Шамброн) i Lifedecor (Стара Любовня. I-Star (вояци Пряшів), Заповці (родина Запотоцькых із Стропкова) і Pusinky (Свідник) – то поступаючі команды із свідницькой кваліфікації. Із Михаловець ся до Бардейова можуть рихтовати команды Цернина (Свідник), Dream Team (Меджілабірці) і Peaky Blinders (Собранці/Убля). Останя кваліфікація в Руськім Керестурі поступ забезпечіла командам НК Русин Міклушевці (Міклушевці, Хорватія), Керестурски Бетятре (Руськый Керестур, Сербія) і Браца Русини (Руськый Керестур, Сербія).

Можете помочі розвивати русиньскы таленты

Rusyn Cup выникнув шість років тому в Братіславі. Каждым роком прибывають кваліфікачны турнаї і приходить все векше чісло змагаючіх ся. Русиньскый Погар є робленый із властных средств і як інформовав Мартін Ямрошковіч, турнай бы на фінале привітав спонзорів, котры бы могли помочі, ці прямыма фінанціями, цінами про шпортовців, стравов, уквартельованьом або іншыма средставами.

„Русины – то вынятковы шпортовці, о чім свідчіть і высокый рівень турнаю. Кедьже турнай робиме за властны средства, радо бы сьме Вас пожадали о спонзорьску поміч, котра бы полегшала орґанізацію турнаю,“ говорить головный орґанізатор.

Покля бы сьте хотіли помочі, хотіли брати участь на розвитку шпортовых талентів меджі Русинами, можете контактовати Мартіна Ямрошковіча на імейловій адресі rusyn.cup@gmail.com або на телефонічнім чіслі +421 907 078 841.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА